Ձեր վստահելի աղբյուրը

1 ոսկե, 3 արծաթե մեդալ: Օլիմպիական խաղերում ցուցաբերած այս արդյունքները Հայաստանի օլիմպիական կոմիտեի գլխավոր քարտուղար Հրաչյա  Ռոստոմյանը գոհացուցիչ է համարում:

«Իհարկե, կարող էինք ավելին: Եղան բացթողումներ, եղան այնպիսի բաներ, որոնք մեր վերահսկողությունից դուրս էին, օրինակ Անդրանիկի ձեռքը, նոն սենս էր»,-լրագրողների հետ հանդիպմանը հայտարարեց Ռոստոմյանը:

Նշենք, որ 31-րդ ամառային Օլիմպիական խաղերի ժամանակ Անդրանիկ Կարապետյանը վնասվածքի պատճառով չէր շարունակել պայքարը, թեպետ պոկում վարժությունում երկրորդ տեղում էր: Մոսկվայում կայացած վիրահատությունը հաջող է անցել:

Կոմիտեի գլխավոր քարտուղարի կարծիքով, Ռիո Դե Ժանեյրոյում կայացած օլիմպիական խաղերը կազմակերպված էին թույլ ու վատ:

«Պարադոքսն այն էր, որ լինելով ոչ լիարժեք կազմակերպված խաղեր, դրանք մեծ հետաքրքրություն էին ներկայացնում հանրության շրջանում: Մեր ունեցած տվյալներով, Բրազիլիա 1.5 մլն տուրիստ էր եկել»,-ասաց նա:

Հիշեցնենք, որ հայ մարզիկները ամառային 31-րդ Օլիմպիական խաղերում նվաճել են 4 մեդալ: 20 տարվա դադարից հետո ոսկե մեդալ է նվաճել հունահռոմեական ոճի ըմբիշ Արթուր Ալեքսանյանը, մրցավարների կողմնակալ որոշման արդյունքում ոսկուց զրկվել և փոխչեմպիոն է դարձել ըմբիշ Միհրան Հարությունյանը, փոխչեմպիոններ են դարձել ծանրորդներ Սիմոն Մարտիսոսյանն ու Գոռ Մինասյանը: