Ձեր վստահելի աղբյուրը

Երևանի Մխիթար Հերացու անվան պետական բժշկական համալսարանի «Հերացի» թիվ 1 հիվանդանոցային համալիրը միանալով ՀՀ առողջապահության նախարարի կոչին՝ նվազեցրել է սրտի ստենտավորման գները: Կլինիկայում նոր գները գործում են այսօրվանից: Այս մասին Panorama.am-ի թղթակցի հետ զրույցում ասաց «Հերացի» թիվ 1 հիվանդանոցային համալիրի գլխավոր բժիշկ Կարեն Սահակյանը:

Նշենք, որ Երևանում և մարզերում սրտի վիրահատությունների գները մատչելի դարձնելու նպատակով ՀՀ առողջապահության նախարարությունը  դեռևս հուլիսին բուժօգնություն իրականացնող կազմակերպություններին և մատակարարներին կոչ արեց ուսումնասիրել և վերանայել սրտային վիրաբուժության գնային քաղաքականությունը:

Կարեն Սահակյանի խոսքերով՝ ԵՊԲՀ-ն վերանայել է գները և որոշում կայացրել՝ նվազեցնել ստենտավորման գները:

Մասնավորապես, եթե նախկինում մեկ դեղապատ մեկ ստենտի տեղադրումն արժեր 1 մլն 650 հազար դրամ, իսկ կորոնարոգրաֆիան` 190 հազար դրամ, ապա սեպտեմբերի 6-ից  ստենտավորումն արժե 1 մլն 100 հազար դրամ, կորոնարոգրաֆիան` 140 հազար դրամ:

Կարեն Սահակյանը հայտնեց, որ գների նվազեցումը կապված չէ որակի փոփոխության հետ. «Գները նվազում են՝ միաժամանակ պահպանելով ծառայության բարձր որակը»,- ասաց նա:

Նա նաև նշեց, որ «Հերացի» թիվ 1 հիվանդանոցային համալիրում ամսական կատարվում է 40-50 ստենտավորում:

Հիշեցնենք, որ  սրտի վիրահատությունների մատչելիության ապահովման կոչին արդեն իսկ միացել են  Գյումրու բժշկական կենտրոնն ու «Աստղիկ» բժշկական կենտրոնը: