Ձեր վստահելի աղբյուրը

Հեռավոր 1996 թվին Ատլանտայի Օլիմպիական խաղերում Հայաստանի հունահռոմեական ոճի հավաքականի անդամ Արմեն Նազարյանը դարձավ Օլիմպիական չեմպիոն: 20 տարի անց նույն մարզաձևի ներկայացուցիչ Արթուր Ալեքսանյանը կրկին կանգնեց պատվո հարթակի առաջին աստիճանին՝ դառնալով Ռիոյում ավարտված ամառային 31-րդ Օլիմպիական խաղերի չեմպիոն:

Հայաստանի հունահռոմեական ոճի ըմբշամարտի հավաքականի գլխավոր մարզիչ Լևոն Ջուլֆալակյանն այս հաջողությունը պատահական չի համարում և, լրագրողների հետ այսօր կայացած զրույցի ժամանակ խոսել է այն ճանապարհի մասին, որը տարավ դեպի Ռիո և մեդալներ:

«Հունահռոմեական ոճի ըմբշամարտի Հայաստանի հավաքականը 2012 թ.-ից առ այսօր պատրաստվել էր Ռիոյի Օլիմպիական խաղերին պատշած ձևով ներկայանալու համար:   Այս ընտրանին բոլոր տարիներին, բոլոր մրցաշարերից վերադարձել է տարբեր մեդալներով, տարբեր գույնի ու քանակի: Օլիմպիական խաղերին մասնակցում էինք արդեն պարտավորված, քանի որ անհրաժեշտ էր լավ հանդես գալ, լավ տեղեր գրավել ու անպայման՝ մեդալներ նվաճել:

Ինչ խոսք, բոլորը սպասում էին մեդալների, և այն նվաճել մեր հավաքականն ունակ էր ու լիարժեք պատրաստ: Կարողացանք արժանանալ մեկ ոսկե և մեկ արծաթե մեդալի, բայց բոլորս լավ գիտակցում ենք և հասկանում, որ 75 կգ քաշային կարգում Արսեն Ջուլֆալակյանը ևս կարող էր մեդալակիր դառնալ, բայց սայթաքեց: Արսենի սպորտային երազանքն էր մասնակցել Օլիմպիական խաղերին և, երևի թե իրեն խանգարեց մեծ ցանկությունը: Սխալը նաև կայացավ նրանում, որ առաջին գոտեմարտի ժամանակ նա մտածում էր ոչ թե մրցակցի, այլ հաջորդ գոտեմարտի մասին, որն իր մշտական հակառակորդ հունգարացի ըմբիշի հետ պետք է լիներ: Սա խանգարեց կենտրոնանալ ու հաղթել: Ամեն դեպքում, Արսենն այն մարզիկը չէ, որ պարտված հեռանա: Նա չի պատրաստվում զենքերը վայր դնել և, եթե այս քառամյա ցիկլը կարողանա հաղթահարել, ապա դեռ հնարավորություն կունենա իր երազանքը կյանքի կոչելու:

84 կգ քաշային կարգում ևս մեդալ նվաճել չհաջողվեց: Մաքսիմ Մանուկյանը, ով թեթև վնասվածք ուներ, վստահեցրեց, որ վնասվածքը չի խանգարի: Եթե նա որոշեր, որ չի կարող լավ մասնակցել, կփոխարինեինք: Ցավոք, հենց առաջին գոտեմարտի ժամանակ զգացվեց, որ լիարժեք չի կարողանում բացահայտել իր հնարավորությունները:

Ինչևէ, Արթուր Ալեքսանյանը դարձավ չեմպիոն, Միհրան Հարությունյանը՝ փոխչեմպիոն: Ռիոյից վերադարձել ենք հպարտ ու պարզ ճակատով: Արթուր Ալեքսանյանը հասավ ամենամեծ բարձունքին: Նույնը կարող եմ ասել Միհրանի համար: Իրականությունն այն է, որ նա այսօր արծաթե մեդալակիր է, բայց մենք ծանոթ ենք գոտեմարտին և ոչ միայն մասնագետների կարծիքով, այլև ոչ մասնագիտական աչքերով էլ պարզ է, որ գոտեմարտի ժամանակ անարդարություն է տեղի ունեցել: Այսօր կարող էինք ունենալ 2 ոսկե մեդալ: Ես, որպես հավաքականի գլխավոր մարզիչ, տղաների ելույթներից գոհ եմ: Ամեն ինչ շատ լավ էր, գերազանց: Սպասելիքները մեծ էին, արդյունքը՝ գոհացնող: Մեր ըմբշամարտի հավաքականը թիմային հաշվարկում զբաղեցրեց 3-րդ տեղը: Հզոր գերտերությունների մեջ կարողացանք նման արդյունք գրանցել: Հուսանք, որ այս հաջողությունները շարունակական կլինեն»,- ասաց Ջուլֆալակյանը:

Ասուլիսի ընթացքում հայտնի դարձավ, որ Հայաստանի ըմբշամարտի ֆեդերացիան մտադիր է բողոքարկել Միհրան Հարությունյանի եզրափակիչ գոտեմարտը՝ դիմելով Լոզանի միջազգային մարզական դատարան: Լևոն Ջուլֆալակյանը չի կարող ասել, թե ինչպիսի որոշում կկայացվի, սակայն հուսով է, որ այն արդարացի կլինի:

«Ինչպես գիտեք, ՀԱՕԿ-ը լուրջ հետևողական քայլեր է կատարում, որպեսզի այս հարցն արդարացի լուծում ստանա: Ոչ մեկս չի կարող ասել, թե ինչ կլինի: Դա կորոշի Լոզանի միջազգային մարզական դատարանը՝ անցնելով բոլոր փորձաքննությունները՝ կապված գոտեմարտի հետ, զննելով բոլոր մանրամասնությունները: Հուսանք, որ այս հարցին արդարացի լուծում կտրվի:

Իմ հնարավորությունների սահմանում չէ ասել, թե ինչ կլինի: Դժվար է նաև ասել, թե ով է նման անարդար մրցավարության մեղավորը: Փաստը մնում է փաստ, որ միջազգային ըմբշամարտի ֆեդերացիան գլխավորում է Լալովիչը, ով ազգությամբ սերբ է: Համոզված եմ, որ նա անձամբ խառնված չէ նման հարցերում, բայց միշտ կան ծախված մարդիկ, ովքեր ուզում են արջի ծառայություն մատուցել: Բնականաբար, ցանկացած մրցավար այդ պահին կցանկանար հաճոյանալ ֆեդերացիայի նախագահի աչքերում»,- ասաց Ջուլֆալակյանը: 

Վերջում գլխավոր մարզիչը շնորհակալություն հայտնեց Հայաստանի ըմբշամարտի ֆեդերացիային, որը, ի տարբերություն մյուս ֆեդերացիաների, ամեն ինչ անում է մարզիկների պահանջները բավարարելու համար: Ջուլֆալակյանը նշեց, որ այս կյանքում պատահական ոչինչ չի լինում և որ ֆեդերացիայի կատարած աշխատանքի պտուղները հենց այս մեդալներն են: