Ձեր վստահելի աղբյուրը

Հուլիսյան ռազմական հեղաշրջման փորձին մասնակցելու կասկածանքով թուրքական հատուկ ծառայությունները ձերբակալել են 105 բանակային իմամների (հոգևոր առաջնորդներ): Լուրը գրում է «Լենտա.ռու»-ն՝ հղում անելով The Daily Mail-ին:

Ձերբակալումները տեղի են ունեցել 17 մարզերում: Ինչպես պնդում են իրավապահ մարմինները, ձերբակալված հոգևորականները իսլամական քարոզիչ Ֆեթուլլահ Գյուլենի շարժման անդամներ են և այնտեղ կարևոր դիրքեր են զբաղեցրել:

Բացի դրանից՝ երկրի ռազմաօդային ուժերից հեռացվել է 73 մարդ՝ 66 սպա և 7սերժանտ: Թուրքիայի պաշտպանության նախարարությունը հայտնել է, որ «զանգվածային կրճատումների հարցին շատ պատասխանատու և զգույշ են մոտեցել: Մեր հերոսական զինվորները հավատարիմ են ժողովրդի, շարունակում են ծառայել»:

Աղբյուրը հայտնում է, որ ներկա պահին թուրքական զինված ուժերում աշխատանքից հեռացվել է 4524 անձ, այդ թվում 151 գեներալ: Նրանցից շատերը հետախուզման մեջ են:

Թուրքիայում ռամզական հեղաշրջման փորձը տեղի էր ունեցել հուլիսի 16-ին, որի հետևանքով ավելի քան 230 մարդ է զոհվել: Իշխանությունները ԱՄՆ-ում բնակվող Գյուլենին մեղադրում էին հեղաշրջում կազմակերպելու մեջ և Վաշինգթոնից պահանջում նրան: Ինքը՝ ընդդիմադիր գործիչը, դատապարտել էր հեղաշրջման փորձը և հայտարարել իր՝ ներգրավված չլինելու մասին: