Ձեր վստահելի աղբյուրը

Մեր տարածաշրջանում ամեն վայրկյան կարող են ինչ-որ նոր փոթորիկներ լինել, իսկ մենք այսպես «թռի-վռի մի ճպուռի» կյանքով ապրելու կամ այսպես շարունակել գոյատևելու իրավունքը չունենք: Մենք հնչեցնում ենք զանգը, որ պետք է համայն հայության պոտենցիալը, հույսը, կամքը միավորել,- «Հոգևոր Հայաստան» նախաձեռնության հիմնադիր համագումարի ժամանակ լրագրողների հետ զրույցում ասաց նախաձեռնության անդամ, երաժիշտ Եղիշե Պետրոսյանը:

Նա ներկայացրեց, որ «Հոգևոր Հայաստանը»-ը նախաձեռնել են ութ հոգով,  բայց այս պահից սկսած նախաձեռնությանը կարող են միանալ բոլոր շահագրգիռ մտավորականները, որոնց համար  կարևոր է երկրի ապագան:

«Մենք առաջարկում ենք բոլոր շահագրգիռ մտավորականներին ինքնակազմակերպվել,  կլոր սեղաններ հրավիրել տնտեսագետների, դիվանագետների, զինվորականների, գիտնականների, մշակույթի գործիչների մասնակցությամբ, որպեսզի համատեղ  հասնենք մեր  բաղձալի երազանքին, ունենանք արդար, մարդասիրական, հարուստ, ինքնավստահ, պաշտպանված երկիր և ազգ: Սրա համար է զանգը հնչեցվում»,- ասաց նա՝ հավելելով, որ իրենց պետք է աջակցի նաև պետությունը, քանի որ այս ամենն անում են, որպեսզի ունենան կարգին պետություն:

Եղիշե Պետրոսյանի խոսքով՝ ծրագրավորում են հոկտեմբերի վերջին կազմակերպել համահայկական համագումար: