Ձեր վստահելի աղբյուրը

«Ավելի քան քսան տարի Հայաստանը տարածաշրջանում առաջատար է եղել սրտային վիրահատության` հատկապես ինվազիվ միջամտությունների ոլորտում:  Այսօր էլ երկիրն ապահովված է լավագույն մասնագետներով, անհրաժեշտ բժշկական տեխնոլոգիաներով, իսկ որ ամենակարևորն է`տարիների ընթացքում հաստատվեց, որ ունենք միջազգային չափորոշիչներին համապատասխանող որակյալ սրտի վիրահատական ծառայություններ»,- այս մասին այսօր կառավարության նիստում հայտարարեց ՀՀ առողջապահության նախարարի պաշոտնակատար Արմեն Մուրադյանը։

Նրա խոսքերով՝ շուրջ 20 տարվա ընթացքում, զարգացնելով Հայաստանում  սրտի վիրահատական ծառայությունները, 1 մասնագիտական կենտրոնից այսօր արդեն իսկ 11 բժշկական կազմակերպությունում առկա են ինտերվենցիոն սրտաբանական բաժանմունքներ: Ըստ Ա.Մուրադյանի՝ որդեգրելով կառավարության մարզերի համաչափ զարգացմանն ուղղված քաղաքականությունը, վիրաբուժական այս ծառայությունը Հայաստանում իրականացնող 11  բժշկական կենտրոնից երկուսը գործում են Շիրակի և Սյունիքի մարզերում:

Արմեն Մուրադյանը նշեց, որ ելնելով ստեղծված իրավիճակից` հաշվի առնելով ինտերվենցիոն սրտաբանություն իրականացնող բժշկական կազմակերպությունների քանակի ավելացումը, մարդկային ներուժի բավարար ապահովվածությունը ոլորտում, ինտերվենցիոն սրտաբանության դեպքերի քանակի տարեցտարի աճը, պետական պատվերի շրջանակներում մատուցվող ծառայությունների հերթագրումների ավելացումը և հիվանդների աճող արտահոսքը հարևան երկիր, ՀՀ առողջապահության նախարարության կողմից կայացվեց որոշում սրտաբանական ծառայությունների գնային քաղաքականության վերանայման վերաբերյալ:

Նրա խոսքերով՝ սեռևս 2015 թվականի «Սրտի անհետաձգելի վիրահատության ծառայություններ» ծրագիրը ներդնելու ժամանակահատվածում ՀՀ առողջապահության նախարարության մասնագետների կողմից իրականացվել են տնտեսագիտական հաշվարկներ ոչ դեղապատ ստենտի տեղադրման գնի վերաբերյալ: Ծրագիրը հաստատվեց 700.000 դրամի շրջանակներում` մեկ դեպքի փոխհատուցմամբ, գործող 1.100.000 դրամի փոխարեն: Որից հետո պարբերաբար անցկացվել են սահմանված կարգով քննարկումներ` դեղապատ և ոչ դեղապատ ստենտների տեղադրման գնային քաղաքականության վերանայման վերաբերյալ:

Արդյունքում, ըստ Արմեն Մուրադյանի, վերանայվել են պետական պատվերի փոխհատուցման առաջարկվող գները: Վերլուծությունը փաստում է, որ յուրաքանչյուր ամիս կտնտեսվի 32.552.000 դրամ, որը նույն ֆինանսական միջոցների տրամադրման դեպքում հնարավորություն կտա շուրջ 30 դեպքով ավելացնելու փոխհատուցվող սրտի վիրահատական միջամտությունների թիվը:

Միաժամանակ, հիվանդների շարունակական բուժումն ապահովելու նպատակով հետվիրահատական-վերականգնողական փուլում նշանակվում է «Կլոպիտոգրել 75 մգ» ազդող նյութ պարունակող «Պլավիքս75 մգ» դեղը: Սանոֆի Ավենտիս դեղագործական ընկերության արտադրության դեղի ներկրման գինը մինչ օրս եղել է 18,72 (ներառյալ ԱԱՀ) եվրո կամ 9950 դրամ (ներառյալ ԱԱՀ), իսկ մանրածախ օղակներում վաճառվում է 10530-12000 դրամով:

Արմեն Մուրադյանը հայտնեց, որ սեպտեմբերի 7-ի Սանոֆի Ավենտիս դեղագործական ընկերության պաշտոնական ներկայացչության կողմից ստացվել է գրություն Պլավիքս 75 մգ N 14 դեղի նոր գնային առաջարկի վերաբերյալ` նոր խմբաքանակի ներկրման գինը կկազմի 7,89  եվրո (ներառյալ ԱԱՀ) կամ 4210 դրամ (ներառյալ ԱԱՀ):

Նա նաև նշեց, որ զուգահեռաբար իրականացվում են որակի ցուցանիշների բարելավման աշխատանքներ:

Այսպիսով, բժշկական կազմակերպություններին ՀՀ առողջապահության նախարարության կողմից առաջարկվել է վերանայել վճարովի ծառայությունների գները` այն համահունչ դարձնելով պետական պատվերով մատուցվող ծառայությունների գներին:

Առաջինը արձագանքել են «Գյումրու բժշկական կենտրոն»-ը, «Աստղիկ» բժշկական կենտրոնը և «Սուրբ Գրիգոր Լուսավորիչ բժշկական կենտրոնը»: «Ուրախությամբ պետք է փաստեմ, որ սրտի վիրահատությունների մատչելիության ապահովման կոչին այսօր միացել են նաև մայրաքաղաքի այլ բժշկական կենտրոններ»,- ասաց Արմեն Մուրադյանը:

Ըստ նրա՝ իրականացվող միջոցառումների արդյունքում ակնկալում են, որ բնակչության համար կապահովվի սրտային ծառայությունների մատչելիություն, կնվազեն հերթագրումները, երկրից հիվանդների արտահոսքը կնվազի, կբարելավվեն սրտաանոթային հիվանդությունների մահացության, հիվանդացության, հաշմանդամության ցուցանիշները: Իսկ, որ ամենակարևորն է, կբարձրանա բնակչության կողմից սրտի վիրահատական ծառայությունների մատուցման վերաբերյալ գոհունակությունը:

Ինչ վերաբերում է դեղերի շուկայական գների ուսումնասիրության վերաբերյալ ՀՀ վարչապետի հանձնարարականին, ապա Արմեն Մուրադյանը հայտնեց, որ    Առողջապահության նախարարության կողմից յուրաքանչյուր ամիս իրականացվում է 54 անվանում լայն սպառում ունեցող դեղերի մանրածախ գների մշտադիտարկում: Հունվար-սեպտեմբեր ամիսների դեղերի մանրածախ գների համեմատությամբ, թվով 54 անվանում դեղերի գները նվազել են ընդհանուր առումով 2,5 տոկոսով, որից 30 անվանում դեղերի գները նվազել են 13,02 տոկոսով, իսկ 24 անվանում դեղերի գները բարձրացել են 10,52 տոկոսով: Օգոստոս-սեպտեմբեր ամիսների դեղերի մանրածախ գների համեմատությամբ, թվով 54 անվանում դեղերի գները նվազել են ընդհանուր առումով 6,06 տոկոսով, որից 31 անվանում դեղերի գները նվազել են 7,08 տոկոսով, իսկ 23 անվանում դեղերի գները բարձրացել են 1,02 տոկոսով: