Ձեր վստահելի աղբյուրը

Դեռևս ամիսներ առաջ Երևանի կրկեսի գեղարվեստական ղեկավար, «Հայաստանի կրկեսային գործիչների միության» նախագահ, պրոֆեսոր Սոս Պետրոսյանը լրագրողներին ասել էր, որ մինչև 2017 թվականի հոկտեմբերի սկիզբը բացվելու է Երևանի կրկեսը: Արդեն այսօր Panorama.am-ի հետ զրույցում Սոս Պետրոսյանը հույս հայտնեց, որ այդ ժամկետն ուժի մեջ կմնա:

«Ամեն օր ես էլ  շինարարներին եմ այդ հարցը տալիս, թե երբ կավարտվի: Իրենք էլ են ուզում, որ շուտ լինի»,- ասաց նա՝ միաժամանակ հավելելով, թե ուշանում է, բայց վերջում բոլորն էլ կտեսնեն, թե ինչ շենք է լինելու:

«Աշխարհում միակ կրկեսն է, որն ունենալու է երկհարկանի ավտոկայանտեղի»,- ասաց Սոս Պետրոսյանը:

Վերակառուցված կրկեսն ունենալու է ութ հարկ, որից երկու հարկը՝ ստորգետնյա, 2500 տեղ՝  նախկին 1560-ի փոխարեն:

Հիշեցնենք, որ դեռևս 2011 թվականի ապրիլին Երևանի քաղաքապետարանը հայտարարել էր, որ «Տաշիր Գրուպ»-ի հետ կնքած պայմանագրով վերջինս պետք է վերանորոգի Երևանի կրկեսը: Երևանի կրկեսի շենքը որոշվեց քանդել, երբ փորձագետները հանգեցին եզրակացության, որ աննպատակահարմար է վերակառուցել եղած հին շինությունը։ 2011թ. օգոստոսի 1-ից սկսվել են Երևանի պետական կրկեսի կառուցման աշխատանքները: Կրկեսի շենքը 1962թ. հիմնադրման օրվանից հետո չի վերանորոգվել: Նոր շենքի նախագծի հեղինակն է ճարտարապետ Վահագն Վերմիշյանը:

Ավելի քան վեց տարի կառուցվող կրկեսն այսօր՝ լուսանկարներում.