Ձեր վստահելի աղբյուրը

«Մեր ակնկալիքը մեկն է, որ մեր առաջադրված տարբերակը կատարվի, այսինքն՝ Լեռնային Ղարաբաղի հակամարտության խնդիրը լուծվի միայն ու միայն քաղաքական խաղաղ պայմաններում, երկխոսության միջոցով, փոխադարձ համաձայնությունների և ամենակարևորը վստահության մթնոլորտի ձևավորման շրջանակներում», -այսօր լրագրողների հետ ճեպազրույցում հայտարարեց Պաշտպանության նախարարի պաշտոնակատար Սեյրան Օհանյանը՝ պատասխանելով Մոսկվայում ղարաբաղյան հիմնախնդրի լուծման շուրջ ընթացող բանակցություններից սպասվող ակնկալիքների մասին հարցին:

Ինչ վերաբերվում է վերջին շրջանում տարածքների հանձնման վերաբերյալ ակտիվ շրջանառվող տեղեկություններին, Օհանյանն ասաց, որ բանակցային գործընթացի շրջանակներում որոշումները պետք է համապարփակ լինեն ու հավելեց.

«Այս իրականության մեջ, երբ դժվար է հակառակորդի հետ լեզու գտնելը և մանավանդ, քառօրյա պատերազմից հետո սադրանքների այս մասշտաբները բերում են նրան, որ շարունակվում է առաջին գծում կամ շփման գծում վստահության մթնոլորտի ձևրավորման ուղղությամբ մերժումը հակառակորդի կողմից: Դա հնարավորություն է մեզ տալիս, որ մենք ասենք՝ մինչև վստահության մթնոլորտ չլինի, չենք կարող խոսել փոխադարձ համաձայնությունների մասին: Եթե Արցախին ու Արցախի ժողովրդին մի բան պատահի, մենք յուրաքանչյուր թիզ հողի համար պայքարելու ենք»:

Անդրադառնալով սահմանային իրադրությանը, նախարարի պաշտոնակատարն ասաց, որ վերջին շրջանում սահմանային լարվածության միտումներ չկան, և կողմերի միջև պայմանավորվածությունը կատարվում է՝ ծանր հրետանի չի կիրառվում, և կրակոցները միայն հրաձգային զենքից են:

«Դրան Լեռնային ղարաբաղի պաշտպանության բանակի դիրքապահները ուշադիր հետևում են և անհրաժեշտության դեպքում, կանխարգելիչ միջոցառումներ իրականացվում են», -հավելեց Սեյրան Օհանյանը: