Ձեր վստահելի աղբյուրը

Ալ.Սպենդիարյանի անվան օպերայի և բալետի ազգային ակադեմիական թատրոնում  այսօր տեղի ունեցավ «Հայաստանի Հանրապետության առողջապահությունը՝ 25 տարեկան» խորագրով տոնական միջոցառումը, որը կազմակերպել էին ՀՀ առողջապահության նախարարությունը, ԼՂՀ առողջապահության նախարարությունը , «Առողջապահության կազմակերպիչների միավորում» հասարակական կազմակերպությունը,  Հայաստանի երիտասարդական հիմնադրամը։

Հանդիսավոր արարողությանը ներկա էին ՀՀ առաջին տիկին Ռիտա Սարգսյանը, ՀՀ առողջապահության նախարար Արմեն Մուրադյանը, փոխվարչապետ Վաչե Գաբրիելյանը, ՀՀ Ազգային ժողովի նախագահի տեղակալ Հ. Նաղդալյանը, առողջապահական համակարգի ղեկավարներ, բուժաշխատողներ։

ՀՀ նախագահի օգնական Ավետիս Բերբերյանը միջոցառման ժամանակ հնչեցրեց ՀՀ նախագահի ուղերձը, որում մասնավորապես ասված է. «Քառորդ դար առաջ մենք իրականացրինք մեր դարավոր երազանքը` ընտրելով անկախության ուղին: Այդ դժվարին ուղին առողջապահության համակարգի աշխատողները պատվով անցան. երկրաշարժ, պատերազմ, դրանց հաջորդող տարիները լուրջ փորձություն էին բոլորիս համար, առանձնահատուկ մարտահրավերներ հատկապես մեր բժիշկների և առողջապահության ողջ համակարգի համար: Կարևոր եմ համարում նաև շեշտել ռազմական բժշկության դերը. այն որպես մասնագիտություն ձևավորվեց արցախյան պատերազմի տարիներին և այսօր ոլորտի անբաժանելի մասն է կազմում: Մեծարման և խրախուսման են արժանի նաև սփյուռքահայ բուժաշխատողները, որոնք իրենց փորձը, հմտությունները ի սպաս դրեցին հայրենակիցների առողջության պահպանման գործին, ինչպես նաև իրականացրեցին բարեգործական ընդգրկուն ծրագրեր»:

«Առողջապահության կազմակերպիչների միավորում» ՀԿ համանախագահ, ԱԺ պատգամավոր  Արա Բաբլոյանը նշեց, որ ՀՀ առողջապահության համակարգը լուրջ ճանապարհ է անցել, հաղթահարել մի շարք դժվարություններ, սակայն հայ մարդուն տրված հատուկ ներուժի և հմտության շնորհիվ կարողացել է դիմակայել և ուղղելով մեջքը՝ առաջ շարժվել: «Արդյունքում՝ մենք ունենք զգալի հաջողություններ առողջապահության մի շարք բնագավառներում: Ակնհայտ է, որ որակական ցուցանիշներով առողջապահությունը բավականին լուրջ աստիճանի է հասել և մեծ քայլերով շարժվում է առաջ, բայց բոլորս էլ հասկանում ենք, որ մենք դեռ շատ անելիքներ ունենք»,- ասաց Արա Բաբլոյանը:

ՀՀ առողջապահության նախարարի տեղակալ Գագիկ Միրիջանյանի խոսքերով՝ 25 տարվա ընթացքում բազմաթիվ փորձությունների է ենթարկվել մեր հանրապետությունը, իր հերթին նաև՝ առողջապահության համակարգը, սակայն  դրանից հետո ունեցել ենք լուրջ ձեռքբերումներ: Մասնավորապես, առանձնացրեց  մարզերում նորագույն բուժկենտրոնների կառուցումը, մի շարք կարևոր օրենսդրական ակտերի ընդունումը, մինչև 7 տարեկան երեխաների անվճար բուժսպասարկումը և այլն: Փոխնախարարը միաժամանակ նշեց, որ  ոլորտում նորանոր մարտահրավերներ կան և առաջիկա տարիների ընթացքում միահամուռ ուժերով դրանք պետք է լուծվեն:

«Առողջապահության կազմակերպիչների միավորում» ՀԿ համանախագահ Դերենիկ Դումանյանը, շնորհավորելով ՀՀ անկախության 25-ամյակի կապակցությամբ, նշեց, որ այս 25 տարիների ընթացքում զգալի աշխատանքներ են կատարվել, բայց դեռ շատ անելիքներ կան, այդ թվում նաև այնպիսիք, որ մեր ազգաբնակչությունը միանշանակ բավարարված լինի բժշկական օգնության որակից, մատչելիությունից և հասանելությունից: «Դեռևս շատ անելիքներ կան, եթե անկախության 50-ամյակին ներկայացնենք մեր աշխատանքները, ապա վստահ եմ, որ մենք գերազանց ցուցանիշներ կունենանք»,- ասաց Դերենիկ Դումանյանը: 

Երևանի «Սուրբ Աստվածամայր» բժշկական կենտրոնի տնօրեն Նիկոլայ Դալլաքյան էլ  խոսելով մանկաբուժության ոլորտի ձեռքբերումների մասին, նշեց, որ 25 տարվա ընթացքում լուրջ քայլեր են ձեռնարկել, ծննդատներում, հիվանդանոցներում նորագույն սարքավորումներ են ներդրվել, ինչի արդյունքում ևս նվազել է մանկական և մայրական մահացությունը: «Հուսով եմ, որ այս հաջողությունները շարունակական  են լինելու»,- նշեց Նիկոլայ Դալլաքյանը:

Նշենք, որ տոնական միջոցառման շրջանակներում  ներկայացվեց ֆիլմաշար, որտեղ ցուցադրվեց  անկախ Հայաստանի առողջապահական համակարգի զարգացումը, ձեռքբերումները։

Համակարգի մի շարք նվիրյալներ էլ արժանացան պարգևների՝ ՀՀ ԱԺ-ի, վարչապետի հուշամեդալների և շնորհակալագրերի:

Մասնավորապես, պարգևների արժանացան բժիշկ, սրտաբան, պրոֆեսոր (ԱՄՆ) Արամ Չոբանյանը, գրող, հրապարակախոս, հասարակական և քաղաքական գործիչ Զորի Բալայանը, բժշկական գիտությունների դոկտոր, պրոֆեսոր, հասարակական գործիչ Լեոնիդ Ռոշալը (Ռուսաստան), Բժշկական գիտությունների դոկտոր-պրոֆեսոր Եվգենի Չազով (Ռուսաստան), անվանի բժիշկ, սրտային վիրաբույժ Հրայր Հովհակիմյանը,  բժշկական գիտությունների դոկտոր, պրոֆեսոր, վիրաբույժ Հովհանես Սարուխանյանը, բժշկական գիտությունների դոկտոր, պրոֆեսոր, մանկական վիրաբույժ, ՀՀ Աժ առողջապահության, մայրության և մանկության հարցերի մշտական հանձնաժողովի նախագահ Արա Բաբլոյանը, բժշկական գիտությունների դոկտոր, պրոֆեսոր, սրտանոթային վիրաբույժ Բագրատ Ալեքյանը և այլ անվանի բժիշկներ:  ՀՀ առողջապահության համակարգում ներդրման համար պարգևատրվեցին նաև «Կարմիր խաչի միջազգային կոմիտեն», ՄԱԿ-ի մանկական հիմնադրամը, «Հայաստան Արցախ հիմնադրամը, Հայկական բարեգործական ընդհանուր միությունը:

Նշենք նաև, որ շնորհակալագրերի արժանացան նաև ՊՊԾ գնդում «Սասնա ծռերի» կողմից պահվող «Շտապօգնություն» ՓԲԸ-ի բուժաշխատողներ Նորայր Թևանյանն ու Սալվադոր Խեչոյանը, բուժքույր՝ Մալինա Մարգարյանը: