Ձեր վստահելի աղբյուրը

Ռոտացիոն սկզբունքով, հերթականության կարգով այս փուլում ՀԱՊԿ գլխավոր քարտուղարի պաշտոնը վերապահվելու է Հայաստանի ներկայացուցչին:  Լրագրողների հետ զրույցում ասաց ՀՀ ԱԺ պաշտպանության, ազգային անվտանգության և ներքին  գործերի մշտական հանձնաժողովի նախագահ Կորյուն Նահապետյանը:

Պատասխանելով դիտարկմանը,  թե ռուսական «Ինտերֆաքս» կայքը գրել էր, որ առաջիկայում  Սեյրան Օհանյանը կազատվի պաշտպանության նախարարի պաշտոնից և կնշանակվի ՀԱՊԿ գլխավոր քարտուղար, Կ. Նահապետյանն ասաց. «Չեմ կարող այս պահին վստահաբար նշել կոնկրետ թեկնածության հետ կապված, բայց լինելու է Հայաստանի ներկայացուցիչ»:

Նա նշեց, որ այս տարի ՀՀ-ն ստանձնել է ՀԱՊԿ նախագահությունը, հոկտեմբերին այստեղ անցկացվելու է ՀԱՊԿ անդամ պետությունների ղեկավարների հավաք, որի ժամանակ էլ որոշվելու է ՀԱՊԿ նոր գլխավոր քարտուղարը:

Պատասխանելով հարցին, թե արդյո՞ք եթե լինի Սերյան Օհանյանը, ղարաբաղյան հակամարտության հարցում, Հայաստանի հետ կապված ՀԱՊԿ դիրքորոշումը կփոխվի դեպի դրականը, Կ. Նահապետյանն ասաց. «ՀԱՊԿ-ն այն կառույցն է, որ ունի իր կանոնադրական խնդիրները: Մեր ակնկալիքներում պետք է հստակ դիրքորոշում ունենալ, որ ՀԱՊԿ-ը չի կարող դուրս գալ այն կանոնադրական  խնդիրներից, որոնք ամրագրված են իր հիմնադիր փասատթղթերում: 

Իհարկե, մեզ համար շահեկան է Հայաստանի ներկայացուցչի նշանակումը ՀԱՊԿ գլխավոր քարտուղարի պաշտոնում, բայց չպետք է չափազանցնել և մտածել, որ միայն այդ փաստով բոլոր հարցերում մենք կարող ենք ակնկալել մեզ համար ամենաշահավետ լուծումները»: