Ձեր վստահելի աղբյուրը

«Կառավարության կազմի հետ կապված քննարկումները շարունակվում են: Կարեն Կարապետյանին տրվել է ազատություն թե կադրային, թե ծրագրային քաղաքականության մեջ»,- Ազգային ժողովում  լրագրողների հետ զրույցում ասաց ԱԺ ՀՀԿ խմբակցության ղեկավար Վահրամ Բաղդասարյանը:

Հարցին, թե ո՞րն էր Հովիկ Աբրահամյանի գլխավոր ձախողումը, նա նշեց. «Այդ թեմային մենք արդեն անդրադարձել ենք: Դա Հովիկ Աբրահմյանի ինքնագնահատում էր, ով գոհ չէր ինքն իր տեմպերից: Բավականին քրտնաջան աշխատանք է կատարել, համենայն դեպս դա չէր գոհացնում կառավարությանը և վարչապետին, վարչապետը խնդրանքով դիմել էր  իր հրաժարականի համար»:

Պատասխանելով ազգային համաձայնության կառավարության ձևավորման մասին հարցին, նա ասաց, որ դրա մասին կոնկրետ կխոսեն արդեն հաջորդ տարվա խորհրդարանական ընտրություններից հետո: Միաժամանակ  Վ. Բաղդասարյանը հավելեց, որ   ազգային  համաձայնության կառավարության հիքմերն արդեն դնում են:

Ինչ վերաբերում է հարցին, թե արդյո՞ք խորհրդարանական ընտրություններից հետո կշարունակի աշխատել Կարեն Կարապետյանը, ՀՀԿ խմբակցությանն ղեկավարն ասաց, որ  կաշխատի, կտրվեն գնահատականներ:

Խոսելով Կ. Կարապետյանի ծրագրային դրույթների մասին, նա ասաց, որ արդեն իսկ նա  հայտարարել է, որ լինելու են երկու փուլից՝ առաջնային, երկրորդային:

«Կլինի քննարկում, արդյունքում կլինեն այն պահանջները, որոնք մենք ունենք»,- հավելեց նա: