Ձեր վստահելի աղբյուրը

Գյումրու Վարդան Աճեմյանի անվան դրամատիկական թատրոնի դերասաններն այսօր լրագրողների հետ հանդիպման ժամանակ ներկայացրեցին թատրոնում  վերջին շրջանում ստեղծված լարված իրավիճակի պատճառը:

Մասնավորապես, թատրոնի վաստակավոր դերասան Սուսաննա Բաղդասարյանը նշեց, որ լրացել է թատրոնի տնօրենի կառավարման ժամկետը և «Հայաստանի հանրապետություն» թերթում հայտարարություն է տրվել  Գյումրու Վարդան Աճեմյանի անվան դրամատիկական թատրոնի տնօրենի մրցույթի համար:

«Թատրոնում անտեղյակ հանկարծ իմանում ենք, որ մեր քաղաքից երկու հոգի հայտ են ներկայացրել մասնակցելու մրցույթին՝ Մարգարիտա Մինասյանն ու Արաքսյա Կիրակոսյանը:  Երկուսն էլ ընդհանրապես  թատրոնի հետ կապ չունեն, չեն տիրապետում թատրոնի օրգանիզմին, կառուցվածքին, իսկ ՊՈԱԿ-ի մասին կանոնադրությամբ  բոլոր իրավասությունները տրված է տնօրենին, որը պետք է ոչ միայն տիրապետի վարչականին, այլև՝ կիսով չափ ստեղծագործականին: Դրա համար թատրոնում մեծ աղմուկ է բարձրացել, որպեսզի այնպիսի թեկնածուներ լինեն, որոնք կապ ունեն թատրոնի հետ»,- խնդիրը ներկայացրեց Սուսաննա Բաղդասարյանը:

Այսպիսով, ըստ նրա, աղմուկն այնքան է աճել, որ ստիպված եկել են Երևան. «Քանի որ նախարարն արդեն հայտարարել է՝ ինքը տեղյակ է, որ թատրոնը դեմ է երկու տիկնանց, քանի որ կոմպետենտ չեն, խոստացել է դրական լուծում տալ: Մենք սպասում ենք այդ դրական լուծմանը»:

Վարդան Աճեմյանի անվան դրամատիկական թատրոնի դերասան Արկադի Ղարագուլյանն էլ նշեց, որ իրենք տեղեկացրել են խնդրի լրջության մասին, իսկ թեկնածուներին հորդորել են հեռու մնալ թատրոնից և այն չտանել կործանման, քանի որ չեն կարող ոչ մասնագետ լինելով թատրոն կառավարել:

«Իրենց հանդեպ մենք ոչինչ չունենք, ուղղակի խնդրել ենք, որ չգնան այդ քայլին: Թատրոնը  վերելք է ապրում, իսկ ոլորտից  անտեղյակ մարդը չի կարող դա շարունակել: Մինչդեռ  թեկնածուները մտածում են, որ իրենք ֆինանսատնտեսական հարցերին շատ լավ տիրապետում են և կարող են որպես տնօրեն աշխատել»,- ասացին դերասանները:

Թատրոնի ռեժիսոր Ասպրամ Բաղդասարյանը նույնպես նշեց, որ իրենք անձերի դեմ ոչինչ չունեն,  միգուցե նրանք տեղյակ չեն, որ թատրոնն ունի որոշ առանձնահատկություններ. «Կամա թե ակամա տնօրենը մտնում է ստեղծագործական և գեղարվեստական աշխատանքների մեջ, դրա համար մենք ուզում ենք, որ կոմպետենտ մարդ գա թատրոն: Մենք պատրաստ ենք բոլորին ընդունելու»:

Հարցին, թե արդյոք դերասաններն ունեն նախընտրելի թեկնածու, պատասխանեցին, որ որևէ թեկնածու չունեն:

Դերասանները  հայտնեցին, որ թատրոնի տնօրենի պաշտոնի համար մրցույթը տեղի է ունենալու սեպտեմբերի 14-ին, սակայն հուսով են, որ մրցույթը չեղյալ կհայտարարեն:  

«Եթե մեր բողոքը հաշվի չառնեն, ապա պատրաստ ենք ծայրահեղ քայլի, որպեսզի ունենանք թատրոնի մասին մտածող, թատրոնի վերելքն ապահովող տնօրեն: Մեր թատրոնը հիմա շատ լավ վիճակում է, հանգիստ աշխատում ենք և մեր պահանջը մեկն է՝ թողնել հանգիստ աշխատի մի թատրոն, որը միշտ եղել է աչքից հեռու, սրտից հեռու, կոչումներից ու ամեն լավ բանից հեռու: Մի քանդեք թատրոնը, թողեք հանգիստ աշխատենք»,- ասացին դերասանները:

Թատրոնի նախկին գեղարվեստական ղեկավար Նիկոլայ Ծատուրյանն էլ նշեց, որ ինքն այս  պատմությունից տեղյակ է: 

«Կոլեկտիվը դեմ է, ես ընդամենը խորհրդական եմ գեղարվեստական մասով, ու կողքից օգնում եմ ներկայացումների ստեղծմանը: Մի բան միայն կարող եմ ասել՝ նման խնդիրներ միշտ կլինեն ոչ  միայն մեր, այլև բոլոր  թատրոններում: Բազմիցս ասել ենք, որ պետք է լինի Թատրոնի մասին օրենք, բայց ոչ մի կերպ չեն ուզում մշակել այդ օրենքը:  Իսկ օրենքը լինելու դեպքում ամեն ինչը տեղը կընկնի: Բռնում են Շահվերդյան Վահեին հանում են, հետո դնում են: Էս բաները տեղի են ունենալու, պետք է Թատրոնի մասին օրենք, սա է իմ խնդրանքը»,- ընդգծեց Նիկոլայ Ծատուրյանը:

Դերասանները բերեցին Վրաստանի օրինակը, որտեղ, ըստ նրանց, կա Թատրոնի մասին փայլուն օրենք, և ըստ այդմ՝  թատրոնի պատասխանատուն ոչ թե ֆինանսական տնօրենն է, այլ թատրոնի գեղարվեստական ղեկավարը: