Ձեր վստահելի աղբյուրը

Սեպտեմբերի 18-ին Սյունիքի մարզի խոշորացված համայնքում, որն ընդգրկում է Գորայք, Ծղուկ, Սառնակունք, Սպանդարյան գյուղերը, տեղի կունենան համայնքապետի ընտրություններ։

Առաջադրված թեկնածուները երկուսն են՝ Գորայք գյուղի ղեկավար անկուսակցական Առուստամ Առուստամյանը և Հանրապետական կուսակցության անդամ, ինքնառաջադրված Մանուչար Մկրտչյանը։ Ընտրված ղեկավարի նստավայրը կլինի Գորայք գյուղը, իսկ ղեկավարման շրջանակը կտարածվի նաև մյուս երեք գյուղերի՝ Ծղուկ, Սառնակունք, Սպանդարյան գյուղերի վրա։ Սա առաջին ընտրությունն է խոշորացված համայնքում։

Նախկին Սառնակունք գյուղի ղեկավար Մանուչար Մկրտչյանը գյուղ այցելած լրագրողներին փոխանցեց, որ խոշորացման արդյունքում փակվելու են միայն գյուղապետարանները, իսկ դպրոցներն, օրինակ, շարունակելու են աշխատել։ Յուրաքանչյուր գյուղում լինելու է երկու աշխատակից՝ կառավարիչ և օպերատոր։

Խոշորացված համայնքի թեկնածուն համայնքի խոշորացումից միայն մեկ դրական սպասելիք ունի՝ Գորայք համայնքում հանքարդյունաբերության միջոցով ստացվող ֆինանսական միջոցները կբաշխվեն նաև մյուս համայնքների վրա։ Նախկին գյուղապետը նաև մտահոգություններ ունի խոշորացման ծրագրից.

«Խնդիրներ, իհարկե, առաջանալու են։ Խոշորացումը բավական ռիսկային է՝ կենտրոնը պետք է բարգավաճի, իսկ մյուս երեք բնակավայրերը՝ ոչ։ Նախադեպ եղել է խորհրդային տարիներին դեռևս՝ այս երեք համայնքները եղել է մեկ գյուղխորհուրդ՝ Սառնակունք կենտրոնով, մյուս երեք բնակավայրերում տարբերությունը զգացվել է»։

Դիտարկմանը, թե ինքը որպես թեկնածու նման հայտարարություն է անում, այսինքն կարելի՞ է ենթադրել, որ ինքն այդ սկզբունքով է աշխատելու, Մկրտչյանը բացասական պատասխան տվեց.

«Ինձ ճանաչողները գիտեն, որ ես այդ սկզբունքով չեմ աշխատելու։ Չի նշանակում, որ ես սառնակունքցի եմ, Սառնակունքին պետք է նայեմ։ Ես ձգտելու եմ առաջինը նայեմ մյուս երեք բնակավայրերին հավասարապես։ Բոլոր չորս բնակավայրերն էլ նույն խնդիրներն ունեն»։
Հարցին, թե բյուջեն կբավականացնի՞ բոլոր չորս գյուղերի համար, Մկրտչյանը պատասխանեց, որ բյուջեի բաշխումը պետք է կատարվի ըստ առաջնահերթության։

Գորայքի մյուս թեկնածուին՝ Առուստամ Առուստամյանին տեսնել չհաջողվեց. Սիսիանում ժողովի էր, փոխարենը խոշորացման ծրագրից դժգոհեցին գյուղացիները։ Գյուղի ֆիզկուլտուրայի ուսուցիչ Կարեն Պետրոսյանը Panorama.am-ի թղթակցի հետ զրույցում ասաց, որ իրենց գյուղում «կյանքը լավ է»։

«Գորայքում «Ամուլսարի» հանքն աշխատում է, աշխատատեղեր կան, գործ կա, մարդիկ զբաղվում են, եթե առաջ արտագաղթ կար, հիմա չկա, մարդիկ որ գնում էլ են, հետ են գալիս։ Հիմա որ խոշորացավ համայնքը էդ ամբողջ գումարը կծախսվի ոչ թե մի գյուղի, այլ մի քանի գյուղի վրա», -նշում է գյուղացին։