Ձեր վստահելի աղբյուրը

«Մանչեսթեր Յունայթեդի» թանկարժեք նորեկները՝ Պոլ Պոգբան ու Հենրիխ Մխիթարյանը, դեռ չեն սկսել ցուցադրել այն խաղը, որը բոլորը սպասում են նրանցից։ Միշտ չէ, որ նոր թիմում հաստատվելը հեշտ է։ Դրա համար ինչ-որ մեկից ամիս կպահանջվի, մյուսի համար՝ մի ողջ մրցաշրջան, իսկ երրորդի մոտ էլ ոչինչ կարող է չստացվել։

Անկասկած, Պոգբայի ու Մխիթարյանի՝ «Մանչեսթեր Յունայթեդ» տեղափոխությունից հետո շատ ժամանակ չի անցել, սակայն նրանց հարմարվելու գործընթացում դեռ որևէ առաջընթաց չի նկատվում։ Բացի այդ, գինը, որը վճարվել է այդ ֆուտբոլիստների համար, նրանցից պահանջում է հնարավորինս արագ ցուցադրել սեփական մակարդակը։ Հակառակ դեպքում կենթարկվեն ուժեղ քննադատության, որը, ի դեպ, յուրաքանչյուր անհաջող խաղից հետո ավելի ու ավելի բարձր է հնչում։ Ինչպես տեղեկացնում է isport.ua-ն, բրիտանական ԶԼՄ-ները Պոգբայի ու Մխիթարյանի անհաջող խաղի մի շարք պատճառներ են նշում։

Մոուրինյոն «զսպում» է Պոգբային

Հենց այսպիսի վերնագրով հոդված է հրապարակվել «Manchester Evening News»-ում։ Մանչեսթերյան հանդեսը կարծում է, որ Պոգբայի դժգույն խաղը «Մանչեսթեր Սիթիի» հետ դերբիում Ժոզե Մոուրինյոյի սխալի հետևանք է։

Լրագրողների կարծիքով՝ Ժոզեն չի օգտագործում Պոլի ուժեղ կողմերը՝ փորձելով նրան իր համար անսովոր դեր պարտադրել խաղադաշտում։ Վերլուծաբանները շեշտում են, որ պորտուգալացի մասնագետը ֆրանսիացուն պետք է խաղադաշտ մտցնի երեք կիսապաշտպանով սխեմայի կիրառման դեպքում, որտեղ երկուսն ավելի շատ կենտրոնացած կլինեն գնդակի խլման վրա՝ Պոլին հնարավորություն տալով ավելի հաճախ առաջ գնալ։ Մինչդեռ Մոուրինյոն գերադասել է Պոգբային խաղադաշտում դիրքավորել Ֆելլաինիի կողքին, ինչը ֆուտբոլիստին խանգարել է դրսևորել իր լավագույն որակները։

Մխիթարյանը երջանի՞կ չէ

Հայաստանի ֆուտբոլի ազգային հավաքականի կիսապաշտպանի խնդիրների մեջ մամուլը կրկին Մոուրինյոյին է մեղադրում։ «The Sun»-ի կարծիքով՝ մարզիչը պետք է Մխիթարյանին հիմնական կազմում խաղալու ավելի շատ հնարավորություններ տար։ Հիմա Հենրիխը դժգոհ է խաղային անբավարար ժամանակից՝ միևնույն ժամանակ չցուցադրելով այն խաղամակարդակը, որն անհրաժեշտ է՝ «ՄՅու»-ի մեկնարկային կազմում հայտնվելու համար։

Այսինքն՝ ինչ-որ փակ շրջան է առաջացել. Մխիթարյանը չի կարողանում հասնել իր նախկին մակարդակին, որովհետև չի խաղում, սակայն չի խաղում, որովհետև չի ցուցադրում իր նախկին մակարդակը։

Բացի այդ, «The Sun»-ը կարծում է, որ Ժոզեն Հենրիխին ճիշտ դիրքում չի օգտագործում։ Հայ ֆուտբոլիստը մարզչից ցուցում է ստանում խաղալ հարձակման գծի ողջ լայնքով, իսկ Մխիթարյանը ցանկանում է գործել հետ քաշված հարձակվողի դիրքում։

Արդյունք

Պոգբայի ու Մխիթարյանի վատ խաղի պատճառները բրիտանական մամուլը կապում է ոչ թե ֆուտբոլիստների, այլ թիմի գլխավոր մարզիչ Ժոզե Մոուրինյոյի հետ, ով, ըստ նրանց, նշված խաղացողներին ճիշտ չի օգտագործում։ Արդյոք դա այդպե՞ս է։ Ասվածի մեջ որոշակի ճշմարտությյուն, իհարկե, կա, սակայն նրանց անհրաժեշտ է ժամանակ տրամադրել։ Միանգամայն հնարավոր է, որ մոտ ժամանակներս նրանք սկսեն ցուցադրել իրենց լավագույն որակները։