Ձեր վստահելի աղբյուրը

Ազգային ժողովում այսօր քննարկվեց  ՀՀ կառավարության կողմից ներկայացված  «Մարդու վերարտադրողական առողջության և վերարտադրողական իրավունքների մասին» և «Հայաստանի Հանրապետության քրեական օրենսգրքում լրացում կատարելու մասին» ՀՀ օրենքներում փոփոխություններ և լրացումներ կատարելու մասին օրենքի նախագիծը:

Ինչպես նշեց ՀՀ առողջապահության փոխնախարար Սերգեյ Խաչատրյանը, օրենքի նախագծի ընդունումը պայմանավորված է վերարտադրողականության օժանդակ տեխնոլոգիաների կիրառման ոլորտում առկա չկարգավորված մի շարք հարաբերությունների օրենսդրական կարգավորման անհրաժեշտությամբ և նպատակ ունի լրացնել օրենսդրական այն բացերը, որոնք առկա են ապագա երեխայի կենսաբանական ծնող չհանդիսացող անձի կողմից վերարտադրողականության օժանդակ տեխնոլոգիաներից օգտվելու իրավահարաբերություններում:

«Հայաստանի Հանրապետության քրեական օրենսգրքում լրացում կատարելու մասին» ՀՀ օրենքի նախագծի ընդունումն էլ նպատակ ունի պատժի սպառնալիքով կանխարգելելու վերարտադրողականության օժանդակ տեխնոլոգիաների կիրառումը` ՀՀ օրենսդրությամբ սահմանված կարգի և պայմանների խախտմամբ, ելնելով ապագա երեխայի իրավունքների պաշտպանությունից:

Նախագծով, մասնավորապես, առաջարկվում է սահմանված կարգով գրանցված ամուսնության մեջ չգտնվող միայնակ օտարերկրացիներին չթույլատրել օգտվել փոխնակ մոր ծառայություններից Հայաստանի Հանրապետությունում:

Երկրորդ՝ վերարտադրողականության օժանդակ տեխնոլոգիաներից օգտվելու դեպքում ՀՀ օրենսդրությամբ  սահմանված կարգով գրանցված (վավեր ճանաչված) ամուսնության մեջ գտնվող ամուսինները կամ նրանցից առնվազն մեկը, իսկ Հայաստանի Հանրապետության օրենսդրությամբ սահմանված կարգով գրանցված (վավեր ճանաչված) ամուսնության մեջ չգտնվող տղամարդը կամ կինը պետք է լինեն ապագա երեխայի կենսաբանական ծնողը:

Օրենքի նախագծով սահմանվում է, որ կինը չի կարող հանդես գալ որպես փոխնակ մայր, եթե 1.առկա է Հայաստանի Հանրապետության առողջապահության բնագավառի պետական կառավարման լիազոր մարմնի կողմից հաստատված բժշկական հակացուցումներից որևիցե  մեկը
2. նախկինում առնվազն երկու անգամ հանդես է եկել որպես փոխնակ մայր
3. փոխնակ մորից ծնված երեխան, տվյալ օրենքով սահմանված կարգով պայմանագիր կնքած վերարտադրողականության օժանդակ տեխնոլոգիաներից օգտվող անձին է հանձնվում, եթե ԴՆԹ-ի (դեզօքսիռիբոնուկլեինաթթու) որոշման  արդյունքում հաստատվում է, որ  ամուսիններից առնվազն մեկը կամ ամուսնության մեջ չգտնվող անձը  հանդիսանում են երեխայի կենսաբանական ծնողը  և փոխնակ մայրը չի հանդիսանում երեխայի կենսաբանական ծնողը:

Սերգեյ Խաչատրյանը նշեց, որ օրենքի նախագծով նաև սահմանվում է, որ վերարտադրողականության օժանդակ տեխնոլոգիաներից օգտվելու իրավունք տրվի ՀՀ-ում գտնվող օտարերկրացիներին, քանի որ այդ իրավունքից ներկայումս կարող են օգտվել միայն ՀՀ-ում բնակվող կամ կեցության կարգավիճակով օտարերկրացիներ:

Ինչ վերաբերում է «Հայաստանի Հանրապետության քրեական օրենսգրքում լրացում կատարելու մասին» ՀՀ օրենքի նախագծին, ապա  քրեական պատժի սպառնալիքի միջոցով ակնկալվում է բացառել առևտրային նպատակով վերարտադրողականության օժանդակ տեխնոլոգիաներից օգտվելու եղանակով երեխաներ ունենալու փաստը:   

ՀՀԿ խմբակցության պատգամավոր Կարինե Աճեմյանը հարցրեց՝ ինչի  համար է նշվել այն պահանջը, որ գրանցված ամուսնության մեջ չգտնվող միայնակ օտարերկրացիներին չեն թույլատրում օգտվել փոխնակ մոր ծառայություններից Հայաստանի Հանրապետությունում, Սերգեյ Խաչատրյանը պատասխանեց. «Մենք նշել ենք, որ մեր  օրենսդրությունից կարող են օգտվել ամուսնացած զույգերը՝ նկատի ունենալով, որ ՀՀ-ում կարող են ընտանիք կազմել միայն կինը և տղամարդը»:

ԱԺ փոխնախագահ Էդուարդ Շարմազանովը տեղից արձագանքեց. «Ապրեք: Այո, որպեսզի մեր երկրում ծնված երեխաներն ապրեն նորմալ, հայկական քրիստոնեական արժեքային համակարգով ու չլինեն ընտանիքներում, որտեղ չկա և այլն, դե հասկացաք… »:

Փոխնախարարը տեղեկացրեց նաև, որ Հայաստանում փոխնակ մայրերի ծառայությամբ երեխա ունենալու 30-40 դեպք է գրանցվում:

ԱԺ պատգամավոր Թևան Պողոսյանը հետաքրքրվեց, թե ինչ է արվում այն երիտասարդ  զույգերի համար, որոնք ցանկանում են երեխա ունենալ, սակայն գումար չունենալու պատճառով չեն կարողանում օգտվել վերարտադրողական օժանդակ տեխնոլոգիաներից:

Սերգեյ Խաչատրյանը նշեց, որ 2015թ-ից սկսած սոցիալապես անապահով ընտանիքների համար վերարտադրողական օժանդակ տեխնոլոգիաներով վերարտադրություն իրականացնելու համար բյուջեով գումար է հատկացվում: Ըստ փոխնախարարի՝ արդեն տասնյակ զույգեր օգտվել են այդ ծրագրից: «2016թ-ից էլ սահմանամերձ համայնքների բնակիչների համար անհրաժեշտ վերարտադրողականության օժանդակ տեխնոլոգիաների կիրառմամբ բժշկական օգնությունն ու սպասարկումը կտրամադրվի պետության կողմից երաշխավորված կարգով: Այս քաղաքականությունը շարունակվելու է»,- ասաց փոխնախարարը: