Ձեր վստահելի աղբյուրը

Այսօր ՀՀ Մշակույթի նախարարության և ՀՀ-ում ԱՄՆ դեսպանության միջև ստորագրվեց «Մեղրիի Սուրբ Սարգիս եկեղեցու պահպանության ու վերականգնման համար ԱՄՆ դեսպանի մշակութային արժեքների պահպանության հիմնադրամի կողմից դրամաշնորհի տրամադրման մասին» հուշագիրը: Փաստաթուղթը ստորագրեցին ՀՀ մշակույթի նախարարի պաշտոնակատար Հասմիկ Պողոսյանն ու ՀՀ-ում ԱՄՆ արտակար և լիազոր դեսպան Ռիչարդ Միլսը:

Մեղրիի Սուրբ Սարգիս եկեղեցին 17-րդ դարի ինքնատիպ կառույց է՝ Միջին Արևելքում ու Կովկասում որմնանկարների եզակիությամբ առանձնացող:

«Սա Հայաստանին տրվող տասներորդ դրամաշնորհն է:  Գումարները, որոնք տրվում են մեր կողմից, այն արժեքների պահպանման համար են, որոնք անգին ժառանգություն են ոչ միայն տվյալ երկրի, այլև՝ ողջ աշխարհի համար»,- ասաց  ԱՄՆ դեսպան Ռիչարդ Միլսը:

Նշենք, որ ԱՄՆ պետքարտուղարությունը հատկացնում է 450 հազար ԱՄՆ դոլար՝ Մեղրու Սուրբ Սարգիս եկեղեցու պահպանության, վերականգնման աշխատանքների իրականացման համար:

Նրա խոսքով՝ եկեղեցում կան առավել վտանգված հատվածներ, որոնք մշակութային գանձ են. «Ամռանը եղել եմ այնտեղ ու անչափ տպավորված էի բացառիկ որմնանկարներով: Մեր նպատակն է, որ Հայաստանն իր պատվավոր տեղը զբաղեցնի զբոսաշրջության քարտեզի վրա, իսկ Հայաստանը դրան արժանի է »,- հավելեց դեսպանը:

ՀՀ մշակույթի նախարարի պաշտոնակատար Հասմիկ Պողոսյանն էլ կարևորեց այն, որ Մեղրի քաղաքում վերականգնվում է մի եկեղեցի, որը հայտնի է իր ինքնատիպ որմնանկարներով. «Մշակությաին տեսանկյունից առանձնակի հետաքրքրություն է ներկայացոնւմ այս եկեղեցին, որ գոյությունը ճարտարապետական տեսանկյունից զատ, նաև կարևոր է քաղաքաշինական առումով»:

Հասմիկ Պողոսյանը տեղեկացրեց նաև, որ ԱՄՆ դեսպանի մշակութային արժեքների պահպանության հիմնադրամի ֆինանսավորմամբ 2005 թվականից մինչ օրս իրականացվել է մշակութային տասը ծրագիր: Ներկայում ընթանում են Գյումրիում՝ Հակոբ Հակոբյանին «Սարերում» որմնանկարի վերականգնման և տեղափոխման, Արենու քարանձավի հնագիտական գտածոների պահպանման աշխատանքները: