Ձեր վստահելի աղբյուրը

Ազգային ժողովի ՀԱԿ խմբակցության ղեկավար Լևոն Զուրաբյանն այսօր ԱԺ ճեպազրույցների ժամանակ մեծ հաջողություն համարեց ընտրական օրենսգրքում փոփոխությունների շուրջ իշխանության և ընդդիմադիր քաղաքական ուժերի միջև ստորագրված համաձայնագիրը:

«Ոչ ոք չէր սպասում, որ իշխանությունները ընտրությանը մասնակցած  անձանց  ցուցակների հրապարակման հարցում կգնան զիջումների: Դրա համար պայքարել ենք 15 տարի: Առանց չափազանցության սեպտեմբերի 13-ը կարելի է համարել քաղաքական ուժերի և քաղհասարակության հաղթանակ: Վերջապես իշխանությունները կատարեցին այդ պահանջը՝ առանց հղումներ տալու Սահմանադրական դատարանի վճիռներին կամ Վենետիկի հանձնաժողովի որոշումներին: Մեզ համար հասկանալի է, որ այս փոփոխություններով, կարելի է ասել, որ ընտրակեղծարարության լրջագույն ծավալը կվերանա »,- նշեց նա:

Լևոն Զուրաբյանի խոսքերով՝ առաջին անգամ Հայաստանում ստեղծվում է մի նոր իրավիճակ, որտեղ հնարավոր է իշխանության փոփոխություն ընտրությունների միջոցով:

«Այստեղ արդեն քաղաքական ուժերի ակտիվությունից է կախված, որքանով մենք կկարողանանք օգտվել այս հնարավորությունից: Եթե մենք բավարար չափով վճռական, հետևողական լինենq, ապա վստահ եմ, որ 2017թ-ի  ապրիլի 2-ը կարող է դառնալ  շրջադարձային Հայաստանում ժողովրդավարության հաստատման առումով»,- նշեց նա:

Անդրադառնալով նորանշանակ վարչապետին՝ ընդդիմադիր պատգամավորն ասաց, որ  վաղ է նրա գործունեության մասին գնահատականներ տալ, միայն կառավարության ձևավորումից հետո կամ 100 օր պաշտոնավարելուց հետո կարելի է նրա գործունեության մասին խոսել:
Լևոն Զուրաբյանը միաժամանակ նշեց, որ ով է լինի այս կոռումպացված միջավայրի մեջ, ոչինչ չի կարող անել: «Հիմնվելով վարչապետի կատարած որոշ հայտարարությունների վրա՝ կարող ենք ասել, որ ինքը շարունակեց արատավոր գիծը, որի մասին վաղուց ասել էինք: Խոսելով մենաշնորհների մասին՝ ասաց, որ մենաշնորհը վատ է, եթե ձևավորվել է ադմինիստրատիվ որոշումներով, իսկ եթե  ձևավորվել է մրցունակ միջավայրում, վատ չէ: Այս հարցում մենք իշխանության հետ լուրջ հակասություններ ենք ունեցել: Մենք կարծում ենք, որ եթե մրցունակ միջավայրում ձևավորվել է մենաշնորհը, դա չարիք է»,- նշեց պատգամավորը:

Լևոն Զուրաբյանն անդրադառնալով վարչապետ Կարեն Կարապետյանի այն հայտարարությունը, թե տնտեսությունը գտնվում է չափազանց ծանր վիճակում, ասաց, որ երբ իրենք խորհրդարանում խոսում էին տնտեսության վիճակի մասին,  իշխանական պատգամավորներն իրենց մեղադրում էին չափազանցության, իրականությունն աղավաղելու մեջ:

Ինչ վերաբերում է վարչապետի՝ գազի և էլեկտրաէներգիայի գների հնարավոր նվազեցման խնդրին , ՀԱԿ պատգամավորն ասաց, որ իրենք ասել են՝ գազի և էլեկտրաէներգիայի հաշվարկման մեթոդաբանությունը փոխելով՝ հնարավոր է առնվազն 25%-ով  նվազեցնել սակագները: Մինչդեռ, ըստ նրա  խորհրդարանի մեծամասնությունը ՀԱԿ-ի այս հայտարարությունը որակեց որպես նախընտրական խոստում: 

«Հիմա  գալիս է նոր վարչապետ և ասում՝ ինքը զբաղվելու է այդ գործով: Հիմա ի՞նչ ասենք, որ  զբաղված են իրողությունն աղավաղելո՞վ, նախընտրական պոպուլիզմո՞վ, մենք այդպես չենք ասի, մենք գիտենք, որ գազն ու էլէկտրականությունը հնարավոր է իջեցնել»,- ընդգծեց  Լևոն Զուրաբյանը: