Ձեր վստահելի աղբյուրը

«Մենք իսկապես պաշտպանել ենք վարչապետ Կարեն Կարապետյանի նշանակումը և լիահույս ենք, որ այն խնդիրները, որոնք այսօր երկրի առջև ծառացած են վարչապետը խորապես գիտակցում է և ունի այդ խնդիրները լուծելու կարողություն»,- այս մասին այսօր ԱԺ ճեպազրույցների ժամանակ ասաց ՀՅԴ խմբակցության ղեկավար Արմեն Ռուստամյանը:

Անդրադառնալով երեկ կառավարության նիստում ՀՅԴ-ական նախարար Արծվիկ Մինասյանի և վարչապետ Կարեն Կարապետյանի միջև տեղի ունեցած  երկխոսությանը, Արմեն Ռուստամյանը պատասխանեց, որ ինքը զերծ կմնար այդպիսի արտահայտությունից. «Նախորդ փորձերը նկատի ունենալով՝ կարծում ենք, որ պետք է զերծ մնանք շոուների տրամաբանությանը համապատասխանող ինչ-որ տպավորություն ստեղծող քայլերից, որոնք շատ կարճաժամկետ կյանք կարող են ունենալ: Այն տեղը չի, որտեղ վարչապետը պետք է հավատա կամ չհավատա: Պետք է ստուգել. եթե մի բան կա, որ տեսնում ես, էլ դրա հավատալը ո՞րն է։ Չկա՞, ուրեմն առավել ևս հավատալու խնդիր չկա: Կոնկրետ կառավարություն է, որտեղ կոնկրետ գործեր պիտի կատարվեն, և այդ գործերը կամ կան, կամ չկան»:

Դիտարկմանը՝ այսինքն, ըստ նրա, շոո՞ւ էր երեկվա միջադեպը, նա արձագանքեց. «Չեմ կարծում: Նոր է վարչապետն իր գործունեությունը սկսում, նա պետք է առավելագույնս ծանոթանա բոլոր ոլորտների կատարված-չկատարվածին ու հավատի միջոցով քննարկումներ կատարելը ճիշտ ճանապարհ չէ: Ի վերջո, մեր պետության մեջ կան լրջագույն խնդիրներ, որոնք օր առաջ պետք է լուծել: Մենք վստահում ենք ամբողջությամբ, մասնավորապես՝ տվյալ պարագայում Արծվիկ Մինասյանին, որ նա գիտի իր համակարգը, իսկ եթե չի հավատում վարչապետը, թող համոզվի»:

Հարցին, թե արդյոք ՀՅԴ-ական նախարարների փոխոխություն կլինի, պատգամավորը նշեց, թե չի կարծում: Նա նաև նշեց, որ ողբերգական չէ, որ եթե իրենց առաջարկված որևէ հայեցակարգ չընդունվի վարչապետի կողմից, բայց պետք է լինի հայեցակարգային քննարկում:

«Եթե խոսքը գնում է նրա մասին, որ մեր նախարարի ներկայացրած հայեցակարգը չի համապատասխանում վարչապետի պատկերացումներին, նա պետք է այլընտրանք առաջարկի: Այդ դեպքում եթե  համեմատություններից ելնելով ստեղծվի մի իրավիճակ, որ վարչապետին ձեռք չի տալիս ներկայացված հայեցակարգը, նա կարող է իրենը պնդել, որովհետև ինքն է ի վերջո երկրի տնտեսության պատասխանատուն, բայց անհատական հակվածություններով մենք երկար ճանապարհ չենք կարող գնալ։ Թող լինի բանավեճ, մենք միայն ուրախ կլինենք, որ լինեն բաց քննարկումներ բոլոր ոլորտների հետ կապված»,- ասաց Արմեն Ռուստամյանը:

Նա նաև նշեց, որ շատ հստակ պետք է լինի՝ եթե նախարարից բան են պահանջում, ուրեմն այդ ամբողջ ոլորտի քաղաքականության իրականացումը պետք է տալ հենց այդ նախարարին, որ պատասխանատվությունն էլ հստակ լինի, լիազորված լինի, ինչն այսօր կառավարության մեջ գոյություն չունի:

Հարցին, թե Կարեն Կարապետյանն ինչ ծրագրով պետք է աշխատի, Արմեն Ռուստամյանը նշեց, որ վարչապետը չի եկել դատարակ տեղ, եկել է այնպիսի ձևավորված միջավայր, որ չի կարող գործող ծրագրերն անտեսել:

«Մենք ունենք համագործակցության հուշագիր, որը ստորագրել ենք ՀՀԿ-ի հետ: Այն վերաբերում է մեր ներքին կյանքի գրեթե բոլոր ոլորտներին, հստակ քայլեր են նախանշված: Հիմա նոր կառավարությունը իր ծրագիրը պետք է ներկայացնի և բացարձակապես անհասկանալի կլինի, եթե չանդրադառնա հուշագրով ամրագրված խնդիրներին»,- ընդգծեց Արմեն Ռուստամյանը:

Դիտարկմանը, թե հնարավոր է այնպիսի իրավիճակ ստեղծվի կառավարությունում, որ ՀՅԴ-ական նախարարների  հանդեպ  այնպիսի պահանջկոտություն հանդես բերեն, որ ինքնակամ վայր դնեն մանդատները, պատգամավորը նշեց, որ իրենք պահանջկոտությունից չեն վախենում, իսկ թե վարչապետը պահանջկոտ է, դա լավ է: