Ձեր վստահելի աղբյուրը

Այսօր Հանրապետության հրապարակում անցկացվող Անկախության 25-ամյակի առթիվ զորահանդեսի փորձի ժամանակ Պաշտպանության նախարարի ժամանակավոր պաշտոնակատար Սեյրան Օհանյանը վերջին ցուցումներն է տվել զորահանդեսի մասնակից զինծառայողներին:

«Մեզանից յուրաքանչյուրի համար մեծ պատիվ է գտնվել Երևան քաղաքի հրապարակում և մասնակցել ՀՀ Անկախության 25-րդ տարեդարձին նվիրված զորահանդեսին: Զորահանդես, որը ի մի կբերի հայ ժողովրդի նորօրյա պատմության ընթացքում անցած ճանապարհը, անկախության ուղին և այն պայքարը, որ հայ ժողովուրդը միասնականորեն կատարել է՝ ձգտելով դեպի ազատ, անկախ Հայաստանի արարման», -հայտարարեց Սեյրան Օհանյանը:

Նա բարձրախոսով դիմելով հրապարակում շարքով կանգնած զինծառայողներին, ասաց, որ յուրաքանչյուր զինծառայողից պահանջվում է զորահանդեսի ծրագրի համաձայն բոլոր քայլերի բարձր մակարդակով կատարում և «իհարկե, բարձր հպարտությամբ անցնել Հանրապետության հրապարակում տրիբունայի կողքով»:

«Հանրապետության նախագահը և ժողովուրդը, անկասկած, գնահատական կտա իր զինված ուժերի պատրաստվածության մասին: Դրա համար հորդորում եմ յուրաքանչյուր զինծառայողի, առաջին իսկ պահից սկսած, կատարել շարային կեցվածքի բոլոր պահանջները», -հայտարարեց Օհանյանը:

Այնուհետև զորահանդեսի փորձի մասնակիցները սկսել են փորձը: Զորահանդեսի փորձի ժամանակ հիշել են ու փառաբանել նաև ապրիլյան քառօրյա պատերազմում հերոսաբար ընկած Ռոբերտ Աբաջյանին, Արմենակ Ուրֆանյանին, Քյարամ Սլոյանին, Ալեքսան Առաքելյանին, Սուրեն Մելքոնյանին, Հայկ Թորոսյանին, Ադամ Սահակյանին և մյուսներին: