Ձեր վստահելի աղբյուրը

Էջմիածին քաղաքում սեպտեմբերի 18-ին նախատեսված քաղաքապետի ընտրությունների քվեարկությունը չի հետաձգվի: Այս մասին Panorama.am-ի հետ զրույցում ասաց ԿԸՀ նախագահ Տիգրան Մուկուչյանը, պատասխանելով հարցին՝ հնարավո՞ր է Էջմիածնում տեղի ունեցած միջադեպի  պատճառով Էջմածնում քաղաքապետի ընտրությունները հետաձգվեն:

«Ընտրական օրենգրքով՝ ընտրության քվեարկությունը չեղարկելու, հետաձգելու որևէ հիմք նախատեսված չէ:  Ընտրատարածքային ընտրական հանձնաժողովներն իրենց գործառույթները պարտավոր են իրականացնել բացառապես  Ընտրական օրենսգրքի կանոնակարգումներին համապատասխան»,-ասաց ԿԸՀ նախագահը:

Նա ընդգծեց, որ նման պայմաններում Ընտրական օրենսգրքում չկա ամրագրված որևէ հիմք, որը հնարավորություն կտար Ընտրատարածքային Ընտրական հանձնաժողովին կամ նրա վերադաս՝  Կենտրոնական ընտրական հանձնաժողովին  որոշում  կայացնելու և քվեարկությունը կասեցնելու, տեղափոխելու վերաբերյալ:

«Նման ինստիտուտ նախատեսված չէ, ինչը նշանակում է, որ քվեարկության օրվա փոփոխություն չի կարող տեղի ունենալ»,-ասաց նա:

Մուկուչյանն նշեց, որ քվեարկության օրվա հետաձգելու վերաբերյալ միջազգային պրակտիկայի ուսումնասիրություն չի եղել. «Նոր օրենսգրքում էլ նման կանոնակարգումներ չկան: Ցանկացած միջադեպի՝ ընտրությունների վրա ունեցած ազդեցությունը գնահատվում է արդյունքների գնահատման տեսանկյունից: Արդյունքների ամփոփման ժամանակ ցանկացած միջադեպ դառնում է հանձնաժողովների քննության առարկա, դրանով արդեն ամբողջական գնահատական է տրվում ընտրությանը»:

Անդրադառնալով միջադեպին, ԿԸՀ նախագահը դատապարտելի համարեց բռնության ցանկացած դեպք, անկախ այն բանից, թե ում նկատմամբ  ու ինչ հանգամանքներով պայմանավորված է այն տեղի ունենում. «Բռնության ցանկացած դեպք անթույլատրելի է ու դատապարտելի»: