Ձեր վստահելի աղբյուրը

Բյուրականի աստղադիտարանի հիմնադրման 70-ամյակին նվիրված միջազգային գիտաժողովը տոն է գիտական հանրության համար: Այսօր ՀՀ Գիտությունների ազգային ակադեմիայի նախագահությունում  ՀՀ ԳԱԱ Վիկտոր Համբարձումյանի անվան Բյուրականի աստղադիտարանի  հիմնադրման 70-ամյակին նվիրված գիտաժողովի ժամանակ իր բացման խոսքում ասաց ՀՀ ԳԱԱ նախագահ Ռադիկ Մարտիրոսյանը:

«Բյուրականի աստղադիտարանը, կարծես թե, հիմնադրվել է ԳԱԱ-ի հետ միասին, ԳԱԱ-ն հիմնադրվել է 1943-ին:  Այդ տարիներին Համբարձումյանը նշանակվեց ԳԱԱ նախագահ և այդ տարիների Համբարձումյանի գիտական գործունեության աստեղային տարիներն էին: Բազմաթիվ աշխատություններ արվեցին աստղագիտության մեջ Համբարձումյանի կողմից, որոնք ամբողջ աշխարհում ընդունվեց, և աստղադիտարանը հանդիսացավ ՀՀ գիտության այցեքարտն ամբողջ աշխարհում»,-նշեց Ռ. Մարտիրոսյանը::

Նշենք, որ գիտաժողովը անցկացվում է «Անկայուն Տիեզերք, էներգետիկ պաշարներ, ակտիվության երևույթներ և էվոլուցիայի գործընթացներ » թեմայով: Գիտական կազմկոմիտեում ընդգրկված են գիտնականներ Հայաստանից, Ֆրանսիայից, Էստոնիայից, Ռուսաստանից, ԱՄՆ-ից և Իտալիայից: Հրավիրված զեկուցողների թվում են արտասահմանյան 24 և Հայաստանի 11 գիտնականներ, գիտաժողովի մասնակիցների ընդհանուր թիվը 70 է:

Գիտաժողովի նպատակն է քննարկել Բյուրականի աստղադիտարանում ծնունդ առած և հարակից գիտական ուղղություններում ձեռք բերված հաջողությունները՝ առաջխաղացման, գալակտիկաների միջուկային ակտիվության հետազոտական տիրույթները, ճառագայթման փոխանակման տեսությունը:

ՀՀ ԳԱԱ  Բյուրականի աստղադիտարանը հիմնադրվել է 1946 թվականին: 1998 թվականից այն կրում է առաջին տնօրեն Վիկտոր Համբարձումյանի անունը: