Ձեր վստահելի աղբյուրը

Արագածոտնի մարզի Թալին քաղաքում գործող «Բարվա» ինովացիոն հետազոտական կենտրոնը ստեղծել է ռեակտիվ շարժիչներով աշխատող սարք, որն ունի երկակի նշանակություն,- լրագրողների հետ զրույցում ասաց «Բարվայի» նախագահ Արամ Վարդանյանը:

Նրա ներկայացմամբ, սարքը կարող է կիրառվել  անօդաչու թռչող սարքի վրա որպես  ռեակտիվ շարժիչ, կարող է զարգացնել մինչև 300 կմ/ժամ արագություն, ավելին,  քան իսրայալեական Harop տիպի անօդաչու թռչող սարքերը:

Ա.Վարդանյանի տեղեկացմամբ, սարքը կիրառվում է նաև  ծաղկած այգիները վաղ գարնանային ցրտահարությունից պաշտպանելու համար:

«Այգին տաքացնում է: Մի գիշերվա ընթացքում կարող է 6-8 հեկտար փրկել»,- ասաց նա՝ հավելելով, որ «AntiFrost»-ը  կարելի է օգտագործել ինչպես բաց տարածքներում, այնպես էլ ջերմոցային փակ կառույցների տաքացման նպատակով:

Panorama.am-ի հետ զրույցում Ա. Վարդանյանն ասաց, որ Հայաստանում մի քանի ֆերմեր գնել են այդ սարքից: 

«Մյուսներն ասում են՝ աշունը միրգը լավ լինի, կգնենք»,- նշեց նա:

Ըստ Ա. Վարդանյանի, այդ սարքը գյուղատնտեսական նպատակով  արտահանել են Իրան, Վրաստան, նաև Ղրիմ:

Ընկերությունն իր արտադրանքը ներկայացրել է «Արտադրված է Հայաստանում-2016» ցուցահանդեսում: Բացի այս սարքից, ներկայացրել է նաև «Զենիթ» հակակարկտային համակարգը, բիոզանգվածի թափոններով (ծառերի ճյուղեր, չոր տերևներ, անտառային մնացորդներ, ցորենի հասկերի մնացորդներ) աշխատող կաթսա: Այս սարքը կարող է տաքացնել մինչև 500 քմ տարածք կամ ջերմոց, մանկապարտեզ, դպրոց:

«Այս տեխնոլոգիայի լայն կիրառումը Հայաստանում թույլ կտա կտրուկ նվազեցնել բնական գազի օգտագործումն  ընդհուպ մինչև սպառումը հասցնել զրոյի և ամբողջովին անցնել թափոնների օգտագործմանը:  Այս սարքը մեծ հեռանկար է բացում Հայաստանում այլընտրանքային  էներգիայի օգտագործման համար»,- ասաց Ա. Վարդանյանը: