Ձեր վստահելի աղբյուրը

Արագածոտնի մարզի Եղնիկ գյուղում համայանքապետի երկու թեկնածուները հավաքել են հավասար թվով ձայներ: ԿԸՀ հրապարակած նախնական տվյալների համաձայն, ՀՀԿ կողմից առաջադրված գործող գյուղապետ Աշոտ Առաքելյանը և անկուսակցական, ինքնաառաջադրված, նույն գյուղի դպրոցի ուսուցիչ Արծրուն Սարգսյանը ստացել են 107 քվե:

2011 թ. ընդունված Ընտրական օրենսգրքի հոդվածը նման դեպքերի համար սահմանում է. «Եթե հավասար թվով առավելագույն կողմ քվեարկված քվեաթերթիկներ ստացել են երկու և ավելի թեկնածուներ, ապա ընտրված թեկնածուին որոշելու համար նրանց միջև անցկացվում է վիճակահանություն»:

Թիվ 15 Ընտրատարածքային ընտրական հանձնաժողովի նախագահ Հովհաննես Ասատրյանը Panorama.am-ի հետ զրույցում հայտնեց, որ վիճակահանությունը տեղի կունենա ուրբաթ օրը, երբ ամփոփվեն քվեարկության արդյունքները:

Նշենք, որ ԸՕ 74 հոդվածը սահմանում է քվեարկության արդյունքների ամփոփման ժամկետները.

«Ընտրատարածքային ընտրական հանձնաժողովը քվեարկության օրվանից հետո` 5-րդ օրը, հիմք ընդունելով ընտրատարածքում քվեարկության արդյունքների արձանագրությունը, դատարանի վճիռները, հանձնաժողովում ստացված դիմումների (բողոքների) քննարկման արդյունքով ընդունած որոշումները, տեղամասային ընտրական հանձնաժողովների գրանցամատյաններում քվեարկությանն օրն արձանագրված խախտումների վերաբերյալ ընդունած որոշումը, ամփոփում է ընտրատարածքում քվեարկության արդյունքները և ընդունում որոշում ընտրությունների արդյունքների վերաբերյալ»: