Ձեր վստահելի աղբյուրը

Որպես նախարար ինձ համար հպարտության զգացողություն էր բոլոր տաղավարներում հայկական արտադրանք տեսնելը, զգալը, որ արտադրանքը որակ ունի, միջազգային մակարդակով անհրաժեշտ մրցունակությունը կա և կարող ենք իրացնել,- «Մերիդիան» ցուցահանդեսային կենտրոնում բացված «Արտադրված է Հայաստանում-2016» ցուցահանդեսում ներկայացված տաղավարները շրջելուց հետո լրագրողների հետ զրույցում ասաց էկոնոմիկայի նախարարի պաշտոնակատար Արծվիկ Մինասյանը:

Նշենք, որ սեպտեմբերի 19-22 ՀՀ էկոնոմիկայի նախարարության և Հայաստանի զարգացման հիմնադրամի կողմից  կազմակերպված  հայկական արտադրանքի մեծամասշտաբ ցուցադրությանը մասնակցում է 300-ից ավելի արտադրողներ և ծառայություն մատուցողներ։

«Սա մեր տնտեսության, ըստ էության,  զորահանդեսն է: Պատահական չէ, որ, սկսած տեխնոլոգիական ապարանքներից, ավարտված՝ սննդով և ծառայություններով, կարող ենք հպարտորեն  ասել, որ ունենք այդ ներուժը: Այո, տնտեսության մեջ որոշակի դրական փոփոխություններ իրականացնելով, աշխուժացնելով՝ կկարողանանք ոտքի կանգնեցնել ողջ տնտեսական ուղղվածությամբ մեր ներուժը»,-  նշեց Ա. Մինասյանը:

Պատասխանելով հարցին, թե «հեղափոխական արտադրատեսականեր» կա՞ն, նախարարի պաշտոնակատարը նշեց.  «Ցանկացած երկրի տնտեսության հիմքը երեք հիմնական ուղղություններով գործողություններն են՝ ներդրումներ, տեխնոլոգիաներ, մասնագիտական կարողություններ, կամ՝  ներուժ, մասնագիտացում:

Ցանկացած գործողություն, որն ուղղված է առնվանզն տեխնոլոգիական փոփոխություններին, մասնագիտական գիտելիքների վրա է հիմնված, դրանք իրենք իրենցով արդեն հեղափոխական են:  Մենք ունենք այդպիսիք թե բարձր տեխնոլոգիաների ոլորտում, թե նորարարական լուծումների առումով,  թե, բնականաբար, մեր հայտնի սննդամթերքը, որն այսօր, վստահաբար կարող եմ ասել, աշխարհում համարվում է լավագույններից մեկը»:

Ա. Մինասյանի խոսքով, այսօր մի քանի գործողություններ կան, որոնք պետք է անել՝ որակի վերահսկողության պատշաճ համակարգի ներդրում, որակի ենթակառուցվածքն ամբողջությամբ վերազինում, որը թույլ կտա մի կողմից ապահովել պատշաճ որակի ապրանք՝ միջազգային մրցունակությանը համարժեք, երկրորդ՝ ապահովել թե ներքին, թե արտաքին սպառողների շահերի պաշտպանությունը:

«Հայաստանը  պետք է աչքի ընկնի և առաջ գնա միջազգային ապրանքաշրջանառության ոլորտում իր որակյալ արտադրանքի ապահովմամբ: Դրա հիմքը կա»,- ընգծեց նախարարի պաշտոնակատարը:

Ըստ նրա, այս ցուցահանդեսը միտված է ոչ այնքան հայկական ապրանքների իրացմանը, որքան  տեղական արտադրության ցուցադրմանը,  իսկ իրացումը պետք է կազմակերպել և իրականացնել դրսի շուկաներում՝ Ռուսաստան, եվրոպական, ամերիկյան, Պարսկաստան, Չինաստան, որտեղ ռազմավարությանը համապատասխան շատ ավելի ակտիվ,  ագրեսիվ քաղաքականություն են ուզում վարել, որպեսզի հայ տնտեսվարողները վստահաբար այդ շուկաներում տեղ ունենան:

«Կարծում եմ՝ սկզբունքային նշանակություն ունի մեր բոլոր արտադրողների և ազգային կապիտալը տիրապետողների ներգրավումը հայկական ապրանքների արտադրության, ծառայությունների մատուցման գործում: Խոսքը բոլորի մասին է՝ անկախ նրանից, թե իրենք ինչպիսի վերաբերմունք ունեն  իշխանության հանդեպ»,- ասաց Արծվիկ Մինասյանը:

Հայաստանի զարգացման հիմնադրամի գործադիր տնօրեն Կարեն Մկրտիչեանն ասաց, որ ցուցահանդեսի նկատմամբ հետաքրքրությունը բավականին մեծ է: Ըստ նրա խոսքի՝ այս ցուցահանդեսը մի քանի թիրախներ ունի: Նախ՝  Հայաստանի արտադրողները ներկայացնեն իրենց ապրանքները միջազգային և տեղական շուկաներին՝ խրախուսելու արտահանության և արտադրանքի ծավալները: Նաև՝  դրսից ներգրավել ներդրողների, որպեսզի դրսի և հայ գործարարների միջև համագործակցություն ստեղծվի:

Հայաստանի զարգացման հիմնադրամի գործադիր տնօրենը հավելեց, որ արտերկրից նույնպես  հետաքրքրված են, մասնավորապես՝ Հայաստանում համագործակցության միջոցով ընկերություններ հիմնելու հարցում: