Ձեր վստահելի աղբյուրը

«Սեպտեմբերի 18-ի վերջը լավ էր», -այսօր Հանրապետական կուսակցության գրասենյակում հայտարարեց ՀՀԿ փոխնախագահ Արմեն Աշոտյանը արտահայտելով իր ուրախությունը սեպտեմբերի 18-ին Հայաստանի հինգ մարզերում կայացած ՏԻՄ ընտրությունների արդյունքների վերաբերյալ:

Աշոտյանի ներկայացրած տվյալներով, 237 խոշորացված համայնքներում կայացած ընտրությունների արդյունքում 161-ում հաղթել են ՀՀԿ թեկնածուները: Հանրապետական կուսակցությունը, նրա խոսքով, ոչ բոլոր համայքներում է պաշտպանել կուսակից թեկնածուին: Եղել են նաև անկուսակցականներ, որոնց սատարել է ՀՀԿ-ն:

«Մեր խնդիրը ոչ թե կոնկրետ թեկնածու փնտրելն է, այլ եղած թեկնածուների մեջ լավագույնին ընտրելը: Թվային արտահայտությամբ ՀՀԿ թեկնածուները և ՀՀԿ-ի կողմից սատարվող անկուսակցականները ընդհանուր առմամբ պահպանել են ՀՀԿ որոշիչ դերակատարությունը այն համայնքներում, որտեղ տեղի են ունեցել վերջին ՏԻՄ ընտրությունները», -հայտարարեց ՀՀԿ փոխնախագահը:

Աշոտյանը համաձայն չէ այն տեսակետին, թե այն համայնքներում որոնք չեն գտնվում Հանրապետականի անդամ մարզպետի «տիրապետության» տակ, ՀՀԿ-ն պարտվում է և մատնանշեց թվային տվյկալներ՝ օրինակ Արագածոտնի մարզի (մարզպետը դաշնակցական է) 80 համայնքներում ընտրությունների արդյունքներով 53 համայնքում ՀՀԿ այս կամ այն թեկնածուն հասել է հաջողության:

«Իրականության մեջ լոկալ պարտությունները նորմալ են, որովհետև բնական է, որ քաղաքական պայքարում հնարավոր չէ միշտ հաղթող դուրս գալ, այն էլ համատարած նման ընտրությունների մեջ: Մենք իրականում նման ցանկություն էլ չունենք: Բազմակուսակցական համակարգ է երկրում և դա ենթադրում է հնարավորություն տալ քաղաքացիներին կատարել ընտրություն», -հավելեց իշխող կուսակցության ներկայացուցիչը:

Հանրապետականը լոկալ պարտություն է գրանցել նաև Արարատի մարզի Նոր կյանք համայնքում, որտեղ 17 տարի կառավարելուց հետո Հանրապետական գյուղապետը պարտվել է «Քաղաքացիական պայմանագիր» կուսակցությանը:

«Ուրախ ենք, որ նոր կուսակցությունները կարողանում են քաղաքական մրցակցության մեջ մտնել, սա նաև ապացույցն է, որ ընտրական գործընթացը Հայաստանում արժանահավատ է և հնարավոր է ընտրություններով ձևավորել և լոկալ, և համապետական իշխանություններ ու հասնել փոփոխությունների», -հավելեց քաղաքական գործիչը:

Սեպտեմբերի 18-ի ընտրությունների արդյունքների գոհ ՀՀԿ-ն պատրաստվում է հոկտեմբերի 2-ի՝ ՀՀ խոշոր քաղաքներում՝ Վանաձորում և Գյումրիում կայանալիք ավագանու ընտրություններին:

«Մենք կառուցողական լավատեսությամբ ենք նայում հոկտեմբերի 2-ի ընտրություններին, որոնց արդյունքների վրա, պատրաստվում ենք ընտրական հաջորդ քայլին՝ համապետական ընտրություններին», -ասաց նա:

Անդրադառնալով Էջմիածնում քաղաքապետի ընտրություններից առաջ երկու թեկնածուների ու նրանց կողմնակիցների միջև տեղի ունեցած միջադեպին, որն ուղեկցվել էր կրակոցներով, Աշոտյանը նկատեց, որ նման երևույթները, այն էլ նախընտրական շրջանում, ամբողջությամբ արմատախիլ անել չի հաջողվել ու հավելեց.

«Բայց ակնհայտ է, որ դինամիկան խիստ դրական է և եթե համեմատենք 10-15 տարի առաջվա ընտրությունների հետ, այս անգամ ընտրությունները կարծում եմ, անցել են շատ ավելի լավ միջավայրում, նախընտրական արշավը խոշոր համայնքներում եղել է մատչելի և հավասար բոլոր թեկնածուների համար:

Արձանագրված իրավախախտումների համար պատասխանատու անձինք, կարծում եմ, պատկան մարմինների հետ գործ կունենան: Ընտրություններն անցել են պատշաճ մակարդակով, ընտրողների կարծիքն են արտահայտել, ընտրարշավը եղել է հավասար: Այդ իրավախախտումները բացառել որևէ երկրում հնարավոր չէ»: