Ձեր վստահելի աղբյուրը

Մենք արել ենք այն, ինչ պետք է անեինք: Չեմ համարում, որ մեծ բան եմ արել, առհասարակ՝ իմ պարտականություններն եմ իրականացրել,- Panorama.am-ի հետ զրույցում ասաց  գնդապետ Գրիգորի Սահակյանը, ով ապրիլյան քառօրյա պատերազմի մասնակից է:

Նա այսօր նախագահական նստավայրում էր: Նախագահի հրամանագրով պարգևատրվեց «Մարտական խաչ» 1-ին աստիճանի շքանշանով՝ հայրենիքի սահմանները պաշտպանելիս ցուցաբերած բացառիկ խիզախության, անձնուրաց քաջության և անմնացորդ նվիրումի համար:

«Կարծում եմ՝ նախագահի այս պարգևը մեր ժողովրդի կողմից մեր բոլոր զինվորականներին տրված գնահատականն է»,- ասաց գնդապետ Սահակյանը:

Նա պատմեց, որ իր զորամասի և ղեկավարած հրետանային ստորաբաժանումների գործողությունների արդյունքում թույլ չեն տվել հակառակորդին իրենց գործողությունների մեջ ընդհանուր առմամբ հաջողություններ ունենալ. «Մեր գործողություններն էին՝ հակառակորդի ուղղությամբ ճիշտ ժամանակին և դիպուկ կրակ բացելը, մարտի ամենակարևոր ժամանակահատվածում ճիշտ և ժամանակին որոշում ընդունելը, որը հնարավորություն տվեց ճշգրիտ կրակային խոցում հասցնել հակառակորդին, ոչնչացել, ճնշել իրենց բոլոր ստորաբաժանումները, որոնք հարձակողական գործողություններ էին իրականացնում»:

Խոսելով իր մարտիկների մասին՝ գնդապետ Գրիգորի Սահակյանը նշեց. «Ամենապատրաստված, ամենագերազանցիկ, ամենախիզախ զինծառայողներն են, ամենահայրենասեր երիտասարդները, ովքեր իմ կողքին են եղել, հնարավորութուն են տվել ինձ, որպեսզի իմ մարտական առաջադրանքը հաջողությամբ կատարեմ»: