Ձեր վստահելի աղբյուրը

Տանկիստ Ռաֆիկ  Կրպեյանն, ով ապրիլյան պատերազմի օրերին  իր  անձնակազմի հետ խոցել է հակառակորդի մեկ տանկ, այսօր  պարգևատրվեց «Մարտական խաչ» 2-րդ աստիճանի շքանշանով՝ «Հայրենիքի սահմանները պաշտպանելիս ցուցաբերած բացառիկ խիզախության, անձնուրաց քաջության և անմնացորդ նվիրումի համար»:

Նա մոտեցավ, Հանրապետության նախագահից ստացավ իր պարգևը, ու ամբողջ ընթացքում հուզված էր:

«Այս ամբողջ ընթացքում հիշեցի իմ ընկերներին, իմ զոհված ընկերներին: Հիշողություններ արթնացան իմ մեջ»,-լրագրողների հետ զրույցում ասաց 20-ամյա Կրպեյանը:

Նա նշեց, որ եթե  կրկին նման իրավիճակում հայտնվեր, կաներ այն, ինչ արել է:

«Եթե նման բան կրկնվի, անպայման  գնալու եմ, լինելու եմ իմ ընկերների կողքին: Վերջերս գնացել էի Թալիշ, տեսա իմ ընկերներին:  Ասում են՝ ամեն ինչ նորմալ է:  Մեր սահմաններն ամուր են՝ իմ ընկերներն են պաշտպանում»,- ասաց Ռաֆիկը:

Նա չէր ցանկանում մանրամասներ ներկայացնել կոնկրետ ռազմական գործողություններից, հիշել իր զոհված ընկերներին, միայն ասաց. «Մեզ ցույց են տվել թշնամու տանկը, մենք նկատել ենք ու անձնակազմով խոցել»:  

«Բոլորս էլ մտածում էինք՝ ամեն ինչ լավ է լինելու, հետ ենք գնալու մեր ծնողների մոտ: Բայց ոչ բոլորը կարողացան հասնել իրենց ծնողներին»,- ասաց Ռաֆիկ Կրպեյանը:

Այժմ նա սովորում է Ֆիզիկական կուլտուրայի հայկական պետական ինստիտուտում: