Ձեր վստահելի աղբյուրը

ՏԻՄ ընտրությունների նկատմամբ հետաքրքրությունը տարեցտարի ավելանում է: Մեծանում է նաև ընտրություններին որպես դիտորդ մասնակցելու, ընտրական գործընթացը վերահսկելու քաղաքացիների հետաքրքրությունը: Այսօր «Ինչպե՞ս են ընթացել ՏԻՄ ընտրությունները. ամփոփ գնահատականներ» թեմայով քննարկման ժամանակ նման կարծիք հայտնեց «Քաղաքացի-դիտորդ» նախաձեռության ներկայացուցիչ Արմեն Գրիգորյանը: 

«Մեր դիտորդական առաքելության շրջանակում սեպտեմբերի 18-ի ՏԻՄ ընտրություններին մասնակցել է  112 դիտորդ 57 ընտրատեղամասերում  16 համայնքներում»,-ասաց Ա. Գրիգորյանը:

Նախորդ ընտրությունների համեմատ նա նկատել է, որ կուսակցություններն էլ սկսել են տեղական ինքնակառավարման մարմինների ընտրություններին առավել ակտիվ մասնակցել:

Գրիգորյանի խոսքով, միաժամանակ շարունակում են չլուծված մնալ մի շարք խնդիրներ, որոնք բացասական ազդեցություն են թողնում ընտրական գործընթացի վրա:

«Մի շատ տարածված խնդիր կա՝ ուրիշի փոխարեն քվեարկելու հետ կապված: Երբ մարդը գալիս է, տեսնում է, իր փոխարեն արդեն քվեարկել են, իր անվան դիմաց ստորագրել են, նրան առաջարկում են ուրիշի անվան դիմաց ստորագրել: Սա համակարգային լուրջ խնդիր է: Սա մենք տեսնում ենք, ոչ միայն ՏԻՄ, այլև համապետական ընտրությունների ժամանակ»,-ասաց նա:

Դիտորդական առաքելություն իրականացրած Գրիգորյանի խոսքով, դա ընտրակեղծարարության կարևոր գործիք է:

«16 համայնքներում էլ նման խնդիր ենք բացահայտել, կարծում եմ սա կապված է ընտրացուցակները չհրապարակելու հետ, եթե հրապարկվեն, կարծում եմ, այդ խախտումը ինչ-որ չափով կնվազի»,-ասաց նա: