Ձեր վստահելի աղբյուրը

«Բարձր պարգև է, և գնահատում եմ, որ Հանրապետության նախագահի կողմից պարգևատրվեց  ողջ առողջապահական համակարգը: Չի կարող լինել մի մարդու պարգև, սա երբեք չի կարող լինել մի մարդու աշխատանքի արդյունք, ոչ էլ մի կոլեկտիվի: Սա ամբողջ համակարգի աշխատանքի վերաբերյալ նախագահի, հայ ժողովրդի վերաբերմունքն է,- նախագահական նստավայրում «Հայրենիքին մատուցած ծառայությունների համար» 2-րդ աստիճանի մեդալով պարգևատրվելուց հետո լրագրողների հետ զրույցում ասաց «Սուրբ Գրիգոր Լուսավորիչ» բժշկական կենտրոնի տնօրեն,  բ.գ.դ., պրոֆեսոր Արա Մինասյանը:

Նա պարգևատրվեց առողջապահության զարգացման գործում ներդրած նշանակալի ավանդի և բազմամյա նվիրումի համար:   

Ա. Մինասյանի խոսքով՝ վերջին մի քանի տարիների ընթացքում առողջապահական ոլորտում էական փոփոխություններ են տեղի ունեցել, հատկապես առողջապահական հիմնարկների շինարարության հետ կապված:

Հիշելով 25 տարի առաջ սեպտեմբերի 21-ը, Արա Մինասյանն ասաց. «Բոլորս էինք ուզում անկախանալ: Բոլորս ենք գնացել և քվեարկել հանուն անկախության»: