Գյումրիում որոշ կուսակցություններ դադարեցրել են քարոզարշավը

Քաղաքական 16:13 20/09/2016 Հայաստան

Գյումրիում որոշ կուսակցություններ դադարեցրել են քարոզարշավը

Այսօր Գյումրու ավագանու ընտրություններում «Բարգավաճ Հայաստան» կուսակցության համամասնական ցուցակը գլխավորող Վարդևան Գրիգորյանի որդու մահվան կապակցությամբ մի քանի կուսակցություններ հայտարարել են քարոզարշավը ժամանակավորապես դադարեցնելու մասին:

«Արշակ Վարդևանի Գրիգորյանի հետ տեղի ունեցածի լուրը լսելուն պես դադարեցրինք քարոզարշավը և այցելեցինք «Գյումրի» բժշկական կենտրոն։Տեղի ունեցածը պետք է պատշաճ քննության ենթարկվի։Ցավակցում եմ Արշակ Գրիգորյանի հարազատներին և մտերիմներին», -հայտարարել է «Քաղաքացիական պայմանագիր» կուսակցության վարչության անդամ Նիկոլ Փաշինյանը:

«Բալասանյան» դաշինքը տարածել է հայտարարություն, որում ասված է. «Վարդևան Գրիգորյանի ընտանիքում տեղի ունեցած ողբերգության պատճառով դադարեցվում է Բալասանյան դաշինքի քարոզարշավը: Հայտնում ենք մեր խոր ցավակցություը և զորակցությունը Գրիգորյանների ընտանիքին»:

«ԳԱԼԱ կուսակցությունը ժամանակավորապես դադարեցնում է ՏԻՄ ընտրությունների նախընտրական քարոզարշավը՝ Գյումրիի Մանկավարժական ինստիտուտի նախկին ռեկտոր, ԲՀԿ թեկնածու Վարդևան Գրիգորյանի որդու՝ Արշակ Գրիգորյանի մահվան միջադեպի հետ կապված: Եթերից հանվել են քարոզչական բոլոր հոլովակները», -ասված է ԳԱԼԱ կուսակցության հաղորդագրության մեջ:

Հոկտեմբերի 2-ին Գյումրիում կայանալիք ավագանու ընտրություններին մասնակցում են նաև ՀԱԿ, Համախմբում, Հայկական վերածնունդ, Գործարար, Գյումրեցու ոգի կուսակցությունները:

Ավելի վաղ Panorama.am-ը տեղեկացրել էր, որ իրենց տան նկուղում գլխի հրազենային վնասվածքով հայտնաբերվել է ԲՀԿ թեկնածու Վարդևան Գրիգորյանի որդու՝ 26-ամյա Արշակ Գրիգորյանի դին: Նրան տեղափոխել են հիվանդանոց, սակայն փրկել չի հաջողվել:

Հարակից հրապարակումներ`

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: