Ձեր վստահելի աղբյուրը

Մենք ոչ թե անկախության 25-րդ տարում ենք, այլ վերանկախացման 25-րդ տարում: Որպես պատմաբան եմ ուզում ընդգծել, քանի որ շատերի մոտ մտայնություն կա, որ մենք վերջին 25  տարվա ընթացքում ենք անկախ,- Կարեն Դեմիրճյանի անվան մարզահամերգային համալիրում Անկախության տոնին նվիրված համերգից առաջ լրագրողների հետ զրույցում ասաց ԳԱԱ պատմության ինստիտուտի տնօրեն Աշոտ Մելքոնյանը:

Նա նշեց, որ հայոց պետականության ունի հազարամյակների պատմություն և այդ իմաստով շղթան շարունավել է, հասել նորագույն շրջանում վերանկախացման շրջանի:

«Ամենակարևորը՝ անկախությունը մենք նորագույն ժամանակներում վերականգնել ենք 1918 թվականի մայիսի 28-ին և այդ անկախության խորհուրդը փոխանցվել է նույնիսկ Խորհրդային Հայաստանին, երկրորդ հանրապետությանը, երրորդ հանրապետությունը հանդիսացել է առաջինի, երկրորդի օրգանական շարունակությունը»,- ասաց պատմաբանը:

Ի՞նչ է տվել անկախությունը:

«Առաջին հերթին անկախության սերունդ, որը երբևէ չի տեսել օտար տիրապետություն և այս 25 տարվա  ընթացքում  նրա մոտ ձևավորվել է պետական մտածողություն, որին երբեք անհնարին է վերադարձնել նորից կախյալ Հայաստանի ժամանակները: Իսկապես անկախությունն աստվածային շնորհ  է, պետք է այս մարտահրավերների, սպառնալիքների ժամանակաշրջանում փայփայել, ապահովել մեր վաղվա ապագայի օրը»,- ասաց Աշոտ Մելքոնյանը: