«Անկախությունը ժամանակի հետ կբերի իր ամենալավ պտուղները»
«25-ամյա մեր երկրին ի՞նչ կարող եմ ցանկանալ: Միայն ու միայն խաղաղություն: Եթե խաղաղություն լինի, բոլոր անհեթեթությունները, խնդիրները կանցեն, կմնա ազգն ու պետությունը»,-Panorama.am-ի հետ զրույցում ասաց ՀՀ ժողովրդական նկարիչ Հրանտ Թադևոսյանը:
Նա համոզված է, որ եթե մի ազգ ուզում է ապրել, հնարավոր չէ այդ ազգին, ժողովրդին ոչնչացնել, վերացնել:
«Այսօր մարդիկ գնում են Հայաստանից: Ուզում եմ առաջիկա հինգ-վեց տարիներին բոլոր մարդիկ վերադառնան Հայաստան: Բոլորը վերադառնալու են այս երկիր, իսկապես երկիր դրախտավայրը մեր Հայաստան աշխարհն է»,- ասաց արվեստագետը:
Հ. Թադևոսյանի ցանկությունն է, որ առաջիկա 25 տարվա ընթացքում մարդիկ երբևէ չմոռանան ամենակարևորի մասին ու զբաղվեն երկրորդական հարցերով, ինչպես այսօր է:
«Ամենակարևորը՝ հայրենիքապաշտապնությունն է, հողատարածքների պաշտպանությունը»,- ընդգծեց նկարիչը:
Հայաստանի արվեստի վաստակավոր գործիչ Ռոբերտ Մլքեյանի ցանկությունն է, որ հայ ժողովուրդն այնքան հնարավորություն ունենա, բարեկեցիկ կյանքով ապրի, որ ազատ ժամերին շփվի բարձր արվեստի հետ:
«Անկախության սկզբի տարիներին զարմանալիորեն մեծ արագությամբ և տեմպերով դասական արվեստը մուտքը գործեց Հայաստան, այսօր ապրում է շատ առողջ կյանքով: Անկախության այս 25 տարվա կարևոր ձեռքբերումներից մեկն ինձ համար այն է, որ այսօր մեր համերգասրահները լեփ-լեցուն են»,- նշեց նա:
ՀՀ վաստակավոր նկարիչ Հաղթանակ Շահումյանի համար անկախության 25 տարիների ամենամեծ ձեռքբերումը հենց անկախության ձեռքբերումն է:
«Սակայն անկախությունը մենք դեռ լավ չենք մարսել: 25 տարին քիչ ժամանակ չէ կայուն, զարգացած պետական համակարգ ստեղծելու համար: Մշակույթի ասպարեզում էլ հետընթաց կա: Բոլորս էլ ուզում ենք ավելի լավ լինի. ինչքան էլ լավ լինի, ավելի լավն ենք ուզելու, բայց դեռ լավին էլ չենք ասել, որ ավելի լավն ուզենք»,- ասաց նկարիչը՝ միաժամանակ վստահություն հայտնելով, որ մի օր անպայման հասնելու են ցանկալի ավելի լավին:
Անկախության տոնի առիթով Հաղթանակ Շահումյանը շնորհավորեց բոլոր այն մարդկանց, ովքեր իրենց լուման ունեն երկրի անկախության գործում, բոլոր հերոսացած մարդկանց, խոնարհվում է այն մարդկանց առջև, ովքեր անկախ դժվարություններին, այսօր մնացել են Հայաստանում, ստեղծագործում են Հայաստանում:
«Մեր իշխանավորներին, կառավարիչներին խոհեմություն եմ ցանկանում, որ մեր երկիրը դառնա ավելի լավը: Բայց մեկ հոգու գործ չէ, բոլորս պետք է ցանկանանք լավ երկիր ունենալ: Դրա համար պետք է մի քիչ մեր անձնական, նեղ գրպանային մտածողությունը վերանա: Այդ դեպքում մեր երկիրը կարճ ժամանակում կարող է դառնալ աշխարհի լավագույն երկրներից մեկը»,- ասաց Հաղթանակ Շահումյանը:
Նկարչուհի Հասմիկ Ավետիսյանի բնորոշմամբ, անկախությունը ամեն դեպքում լավ գաղափար է, սակայն ամեն ինչի սկիզբը միշտ բարդ է լինում:
«Անկախությունը ժամանակի հետ կբերի իր ամենալավ պտուղները, առաջին հերթին գիտակցության մեջ, հետո նոր, առավել ևս, արվեստի: Արվեստն այնպիսի երևույթ է, որ գումարի հետ է կապված: Արվեստագետներին, կարծում եմ, անհրաժեշտ է մի գիտակից խավ, որ ունի գումար և ճաշակ, կուլտուրա: Հիմա արվեստասեր խավերը բաժանված են՝ աղքատ և հասկացող, հարուստ ու չհասկացող: Երբ արվեստասերներն ու հարուստները միանան, արվեստը ծաղկում կապրի: Ամենավառ օրինակը՝ Վերածննդի դարաշրջանը, երբ վերնախավը հասկացավ, որ արվեստի միջոցով ես ներկայանում աշխարհին: Եթե մեզ մոտ հարուստ վերնախավը դա հասկանա, արվեստում շատ ավելի շուտ, քան նորից մի 25 տարի, կունենանք հաղթանակ»,- ասաց Հասմիկ Ավետիսյանը:
1991 թվականի սեպտեմբերի 21-ի Հայաստանի տարածքում անցկացվեց հանրաքվե՝ ԽՍՀՄ-ի կազմից դուրս գալու և անկախանալու նպատակով։ Խորհրդարանի որոշմամբ, Հայաստանում հանրաքվեն անցկացվել է Հայաստանի անկախության մասին հռչակագրի դրույթներից ելնելով:
ՀՀ Անկախության հռչակագիրն ընդունվել է 1990թ. օգոստոսի 23-ին. «Հայկական ԽՍՀ Գերագույն խորհուրդը, արտահայտելով Հայաստանի ժողովրդի միասնական կամքը, գիտակցելով իր պատասխանատվությունը հայ ժողովրդի ճակատագրի առջև համայն հայության իղձերի իրականացման և պատմական արդարության վերականգնման գործում, ելնելով մարդու իրավունքների համընդհանուր հռչակագրի սկզբունքներից և միջազգային իրավունքի հանրաճանաչ նորմերից, կենսագործելով ազգերի ազատ ինքնորոշման իրավունքը, հիմնվելով 1989 թվականի դեկտեմբերի 1-ի «Հայկական ԽՍՀ-ի և Լեռնային Ղարաբաղի վերամիավորման մասին» Հայկական ԽՍՀ Գերագույն խորհրդի և Լեռնային Ղարաբաղի Ազգային խորհրդի համատեղ որոշման վրա, զարգացնելով 1918 թվականի մայիսի 28-ին ստեղծված անկախ Հայաստանի Հանրապետության ժողովրդավարական ավանդույթները, խնդիր դնելով ժողովրդավարական, իրավական հասարակարգի ստեղծումը
ՀՌՉԱԿՈՒՄ է անկախ պետականության հաստատման գործընթացի սկիզբը»:
Բնակչության ճնշող մեծամասնությունը «այո» ասաց անկախությանը։ Հանրաքվեի արդյունքների հիման վրա 1991թ. սեպտեմբերի 23-ին Հանրապետության Գերագույն խորհուրդը Հայաստանը հռչակեց անկախ պետություն։
Լրահոս
Տեսանյութեր
Գիշեր-ցերեկ կաշխատենք, միայն առաջվա Հայաստանում ապրենք. Քաղաքացիները՝ աշխատաժամանակի կրճատման մասին
