Ձեր վստահելի աղբյուրը

«Կառավարության կառուցվածքի մասին» օրենքի նախագծում  կատարված փոփոխությունների  համաձայն՝ քաղաքաշինության նախարարությունը վերացվում է, և ստեղծվում է ճարտարապետության և մշակութային արժեքների պահպանության կոմիտե: Այսպիսով՝  մշակութային արժեքների պահպանման լիազորությունն առանձնացվում է մշակույթի նախարարությունից:

«Ես գիտեմ, որ մշակույթի նախարարը դա սխալ կհամարի, որ՝ մշակույթի նախարարությունը այն ավելի լավ կպահպանի, քան ճարտարապետները, քանի որ նրանք ավելի ագրեսիվ են, ժամանակակից են, բայց մենք ուզում ենք  մշակութային արժեքների պահպանության լիազորությունը տալ կոմիտեին»,- ասաց Կարեն Կարապետյանը:

Բնականաբար, ՀՀ մշակույթի նախարար Հասմիկ Պողոսյանն առարկեց` ասելով, որ ինչպես էլ իրավաբանական հարցերը ձևավորվեն, Հայաստանը տարիներ շարունակ հիմնվել է եվրոպական փորձի վրա, քանի որ մեր պատմամշակութային ժառանգությունն իր կշռով համահունչ է այնպիսի պետությունների չափանիշներին, ինչպիսիք են Իտալիան ու Ֆրանսիան:

«Կիրառելով փորձը թե օրենսդրական դաշտում, թե այլ գործընթացներում, մենք այդ ոլորտ զարգացրել ենք այդ տրամաբանության մեջ: Այդ երկրներում շատ մեծ կշիռ է տրվում հուշարձանների պահպանության ոլորտին, դրանք հզորագույն կառույցներ են,  գործակալություններ` բոլոր տեսակի լծակներով, ներառյալ` վերահսկողական: Իմ կարծիքով` քաղաքաշինության խնդիրները դնել մի կառույցի մեջ`  հուշարձանների պահպանության ոլորտի հետ, դա նշանակում է, որ մենք լուրջ վտանգելու ենք պատմամշակութային ժառանգության պահպանությունը: Ես խնդրում եմ հաշվի առնել իմ ահազանգը` մեր ազգային մշակույթի շահերից ելնելով, այս հարցը լրջագույնս քննարկվի»,- ասաց Հասմիկ Պողոսյանը:

Քաղաքաշինության նախարարի ժամանակավոր պաշտոնակատար Նարեկ Սարգսյանն էլ նկատեց, որ այստեղ կա թյուրըմբռնում: 

«Խոսքը հուշարձանների պահպանության մասին չէ: Խոսքը գնում է միմիայն վերակառուցվող հուշարձաններին՝ այնքանով, որ դրանք կապ ունեն ճարտարապետության կամ շինարարության հետ»,- ընդգծեց Նարեկ Սարգսյանը: