Պրահայի ճարտարապետական շաբաթում Հայաստանից երկու նախագիծ է ներկայացվելու
Պրահայում ամեն տարի անցկացվում է ճարտարապետության և քաղաքաշինության միջազգային փառատոն, որին Հայաստանն այս տարի արդեն չորրորդ անգամ է մասնակցելու: Բացի այդ, Հայաստանն իրավունք է ստացել հենց Հայաստանում անցկացնել նմանատիպ տեղական փառատոն,- Panorama.am-ի հետ զրույցում ասաց «Ճարտարապետական շաբաթ» փառատոնի տնօրեն Տաթևիկ Զաքարյանը, ով Պրագայի փառատոնի պաշտոնական ներկայացուցիչն է Հայաստանում:
Նրա ներկայացմամբ, Երևանում կայացած «Ճարտարապետական շաբաթ»-ի շրջանակում ներկայացվել են Պրահայի ճարտարապետական շաբաթում Հայաստանը ներկայացնելու համար անցկացված մրցույթի մասնակիցները, ինչպես նաև նախորդ տարիների հաղթող նախագծերը։
Այս տարի սեպտեմբերի 26-ից հոկտեմբերի 7-ը Պրահայում Հայաստանը ներկայացնելու հնարավորություն ստացավ Tim Flynn Architects –ի նախագծած Դիլիջանի միջազգային դպրոցը, և Լուսինե Բաղդասարյանի և Արամ Շահոյանի նախագծած ուղահայաց հողագործության կենտրոնի նախագիծը:
Տ. Զաքարյանի խոսքով, միջազգային ժյուրիին Հայաստանի կողմից ներկայացվել են տասից ավելի նախագիծ: Թեման՝ «Օրգանիկ քաղաք»: Միջազգային ժյուրին ընտրել է Tim Flynn Architects –ի նախագծած Դիլիջանի միջազգային դպրոցը, իսկ Լուսինեի և Արամի նախագիծն արժանացել է հատուկ մրցանակի Պրահայի փառատոնի կազմակերպիչների կողմից և ներկայացվելու է փառատոնի կատալոգում և գովազդային վահանակների վրա:
«Այսինքն այս տարի մենք երկու մասնակից ունենք»,- ընդգծեց նա:
«Օրգանիկ քաղաք»-ը կանցկացվի 2016 թվականի սեպտեմբերի 26-ից հոկտեմբերի 9-ը Պրահայի Մանես շենքում՝ մոդեռնիստական ժառանգության գոհար և ցուցահանդեսների ու միջազգային փառատոների անցկացման գլխավոր վայրերից մեկում: Ճարտարապետության և քաղաքաշինության միջազգային փառատոնը ներկայացնում է ժամանակակից աշխարհի ճարտարապետության, քաղաքաշինության, լանդշաֆտի, քաղաքի վերածնման և զարգացման օրինակներով ամենավառ նախագծերը:
Պատասխանելով հարցին, թե ի՞նչ է «օրգանիկ քաղաք»-ը, Տ. Զաքարյանն ասաց. «Արդյո՞ք քաղաքն ապրող օրգանիզմ է. «Նյու Յորք Թայմս»-ի հոդվածներից մեկում Ջոնահ Լեհրերն անդրադառնում է տեսական ֆիզիկոսներ Ջեֆրի Ուեսթի և Լուի Բետտենքուորթի աշխատանքին, որտեղ նրանք ձեռնամուխ են եղել գտնելու քաղաքային միջավայրի ֆենոմենի ետևում թաքնված դինամիկան: Արդյունքում պարզվեց, որ շատ ասպեկտներում քաղաքն ինչպես մի մեծ կենդանի օրգանիզմ լինի: Ճիշտ այնպես, ինչպես մեծ կենդանին մեկ կիլոգրամի դիմաց պահանջում է ավելի փոքր ռեսուրսներ, քան փոքր կենդանին, այդպես էլ քաղաքներն են. որքան ավելի մեծ են, այնքան ավելի արդյունավետ են և սպառում են ավելի քիչ ռեսուրսներ: Ձևաբանորեն՝ նմանությունն ամրապնդվում է: Ճիշտ ինչպես կենդանի էակը, քաղաքն աճում է, փոխանցում ինֆորմացիա, թափոններ արտանետում, գոյացնում (ի վերջո, փողոցներին մենք «զարկերակներ» ենք անվանում): Հետաքրքիր է՝ հետազոտությունները ցույց են տալիս նաև միանգամայն հակառակ փաստեր. քաղաքներն ամբողջովին տարբերվում են կենդանի օրգանիզմներից, որովհետև որքան մեծ են նրանք, այնքան արագ է կատարվում նրանց «նյութափոխանակությունը»` կյանքի ռիթմը, արտադրության ծավալը, հարստությունը, հանցագործությունները և այլն: Ավելին, այս արագ «նյութափոխանակությունը» նշանակում է, որ քաղաքի աճը սահմանափակված է միայն իր առկա ռեսուրսներով: Ինչևէ, սա է ամենակարևոր խնդիրը: Աշխարhում, որտեղ մարդկության ավելի քան 50 տոկոսն ապրում է քաղաքային վայրերում, մարդկության ապագայի համար շատ կարևոր է հասկանալ քաղաքի դինամիկան և դրա ադեցությունը հասարակական կյանքի վրա: Եթե քաղաքն իսկապես ապրող օրգանիզմ է, ապա ինչպե՞ս են ճարտարապետությունը, զարգացումը, քաղաքաշինությունը, ենթակառուցվածքներն ու տեղեկատվությունը պահպանում այս լողացող կյանքի տեսակը ողջ և առողջ: Ինչպե՞ս է քաղաքի ֆիզիկական տարածքը՝ օրգանիզմի հյուսվածքները, ազդում նրա բնակչության վրա: Եվ ամենակարևորը, ի՞նչ է մեզ պատմում այս օրգանիկ քաղաքն իր մասին:
Լուսանկարները՝Architecture week Yerevan ֆեյսբուքյան էջից:
Լրահոս
Տեսանյութեր
Քեզ ըտենց Դո՞գն է ասել. Լարված վիճակ Երևանի ավագանիում
