Ձեր վստահելի աղբյուրը

Գործադիրի այսօրվա նիստում ՀՀ կառավարության աշխատակազմի ղեկավար-նախարար Դավիթ Հարությունյանը զեկուցեց կառավարության կառուցվածքային փոփոխությունների մասին:

Փոփոխությունների համաձայն՝ էկոնոմիկայի նախարարությունը վերանվանվում է ներդրումների և ձեռնարկատիրությանն աջակցման նախարարություն,   Էներգետիկայի և բնական պաշարների նախարարությունը վերանվանվում է էներգետիկ ենթակառուցվածքների և բնական պաշարների նախարարություն, իսկ տրանսպորտի և կապի նախարարությունը՝ տրանսպորտի, կապի և տեղեկատվական տեխնոլոգիաների նախարարություն:

Քաղաքաշինության նախարարությունն էլ ցանկից դուրս է գալիս և դառնում է կոմիտե:

Նշենք նաև, որ տեղեկատվական տեխնոլոգիաների, զբոսաշրջության, ավիացիայի  ոլորտները դուրս կբերվեն էկոնոմիկայի նախարարության լիազորությունների շրջանակից: Մասնավորապես, ՏՏ ոլորտի կարգավորումը կլինի Տրանսպորտի, կապի և տեղեկատվական տեխնոլոգիաների նախարարության ենթակայության ներքո:

ՀՀ վարչապետ Կարեն Կարապետյանը մանրամասն ներկայացրեց այն տրամաբանությունը, որով առաջնորդվել են փոփոխությունները կատարելիս:

Անդրադառնալով էկոնոմիկայի նախարարության վերանվանվանը՝ նշեց, որ ուզում են հատուկ շեշտադրել, որ գործարարներն ունեն մի ատյան, որտեղ կարող են ներկայացնել իրենց բողոքները, պահանջները, ցանկությունները , խորհուրդները. «Եւ դա լինելու է այն օղակը, որը  գործարարի ձեռքը բռնած անցնելու է, որպեսզի  իրենց համար խոչընդոտ չստեղծվի: Ձեռնարկատիրությանը, ներդրումներին աջակցելու  համար պետք է ռեալ ունենանք տնտեսական անալիզ և էկոնոմիկա: Եթե «Էկոնոմիկա» բառը չկա, դա չի նշանակում, որ այդ գործառույթը չի արվում»:

Էկոնոմիկայի նախարարի պաշտոնակար Արծվիկ Մինասյանն առարկեց.  «Դե, բնականաբար, որպես էկոնոմիկայի նախարարի ժամանակավոր պաշտոնակատար,  ինձ ցանկալի չէ «էկոնոմիկա» բառը հանելը, առավել ևս, որ ես էկոնոմիկան պատկերացնում եմ ավելի լայն, քան ներդրումներն են, կամ ձեռնարկատիրությանն աջակցությունը: Ահա, թե ինչու, ընդունելով հանդերձ Ձեր կողմից կատարված շեշտադրումը, որ ներդրումներն ու ձեռնարկատիրությանն աջակցությունը պետք է առանձին ուղղություն լինեն, ինձ մտահոգում են մի քանի հարցեր, որոնք այսօր էկոնոմիկայի նախարարության տիրույթում են, սակայն  անվանման մեջ դրանք չեն երևում: Մասնավորապես` առևտրի հատվածը, օրինակ՝  արտաքին առևտուրը, որը ներդրումների հետ համարվում է մեր երկրի տնտեսության հիմնական շարժիչ ուժը: Գուցե այն այլ նախարարություն է գնալու կամ մնալու է, կխնդրեի,  որ անվանման մեջ այդ շեշտադրումը լինի»:

Երկրորդ  խնդիրը, ըստ Արծվիկ Մինասյանի, վերաբերում է որակի ենթակառուցվածքներին, մասնավորապես՝ ո՞ր մարմնի լիազորության ներքո են գտնվելու:

Ինչ վերաբերում է ՏՏ ոլորտին, Արծվիկ Մինասյանը նշեց, որ բարձր գնահատելով տրանսպորտի և կապի նորանշանակ նախարարի բարձր կարողությունները և նրա վերաբերյալ դրական կարծիքը ՏՏ ոլորտում, ապա ցանկալի է, որ ՏՏ ոլորտը չդիտարկվի որպես զուտ ծառայությունների ոլորտ, որովհետև ՏՏ ոլորտը ներկայումս ընկալվում է որպես արդյունաբերություն:

Վարչապետ Կարեն Կարապետյանը արձագանքեց. «Պարոն Մինասյան, մենք  «էկոնոմիկա» բառն ենք ընդամենը հանում: Մենք ընդամենը ակցենտն ենք փոխում, որպեսզի գործարարը, ներդրողը հասկանա` մեկ հասցե ունի: Որ ասում եք ` անվանման մեջ չկա «առևտուր» բառը, բայց էկոնոմիկայի նախարարության մեջ էլ չկա առևտուր բառը,ու նախարարությունը զբաղվում էր, չէ՞, առևտրով: Երբ ընդունվի կառավարության ծրագիրը, մենք հաշվի կառնենք կառուցվածքային հարցերը»: