Ձեր վստահելի աղբյուրը

ՀՀ կառավարության այսօրվա նիստում հավանության արժանացավ «Գյումրու Մ.Նալբանդյանի անվան պետական մանկավարժական ինստիտուտ»  պետական ոչ առևտրային կազմակերպությունը հիմնադրամի վերանվանելու նախագիծը:

Վարչապետ Կարեն Կարապետյանը Կրթության և գիտության նախարարի պաշտոնակատար Լևոն Մկրտչյանից հետաքրքրվեց, թե ինստիտուտը ՊՈԱԿ-ից  հիմնադրամի վերածելն ինչ փոփոխություններ է իր հետ բերելու. «Մենք չենք խոսում, թե որքան կարևոր է կրթության ոլորտը, որ վաղվա  ՀՀ քաղաքացուն պետք է տեսնենք կիրթ: Մենք այստեղ շատ բան ունենք խոսելու, և երբ թիմը վերջնական ձևավորվի, կխոսենք: Հիմա կբացատրե՞ք, թե մենք ինչն ենք փոխում, ինքը ինստիտուտ է, ի՞նչն է փոխվում կառավարման կանոնների մեջ»:

Լևոն Մկրտչյանը նշեց, որ բուհերը հիմնականում պետական ոչ առևտրային կազմակերպություններ էին, այնուհետև ձևավորեցին հիմնադրամներ, որ կարողանան ավելի ազատ և ինքնավար գործել` ֆինանսական առումով: Նրա խոսքերով՝ մի քանի համալսարաններ դեռևս շարունակում են ՊՈԱԿ մնալ, նրանք էլ պետք է գան, բայց հիմնադրամ ձևաչափն էլ չի բավարարում բուհերի լիարժեք կառավարմանը:

Դրա համար, ըստ նրա, կարիք ունեն  առաջիկայում «Բարձրագույն կրթության մասին» օրենքում նկարագրել հիմնադրամի յուրահատուկ ձևաչափը, որը հատուկ կլինի կրթական կամ համալսարանական համակարգին. «Այսօրվա հիմնադրամները հիմնականում չեն արտացոլում այն խնդիրների լուծումը,  որն ունի բարձրագույն կրթական համակարգը»:

Վարչապետը նորից հարցրեց, թե ի՞նչ  թույլ չի տալիս այսօրվա կրթական համակարգը  և նոր առաջարկվող համակարգն ի՞նչ է թույլ տալիս:

Լևոն Մկրտչյանը նշեց, որ առաջարկվող փոփոխությամբ արմատական փոփոխություններ են տեղի ունենում կառավարման խորհրդի կազմում: ՊՈԱԿ-ը շատ ավելի կենտրոնացված է, իսկ հիմնադրամը հնարավորություն է տալիս համալսարանին ավելի ազատորեն տնօրինելու  իր միջոցները: Մասնավորապես, հիմնադրամները շատ ավելի ազատ են իրենց ֆինանսական քաղաքականության մեջ:

«Որ ասեմ` ես մինչև վերջ պատկերացրեցի, թե ինչ փոփոխություն է կատարվում, ճիշտն ասած` չէ։ Բայց քանի որ արդեն քննարկել եք, ապա կընդունենք, բայց  հետագայում նորից կվերանայենք»,- ասաց վարչապետը:

Ըստ Լևոն Մկրտչյանի ներկայացման՝  հիմնադրամը այսօր չի բավարարում բուհերի խնդիրների լուծմանը և կարիք կա հիմնադրամների մասին օրենքում առանձին նկարագրել բուհերի ինքնավարությունը ֆինանսական տեսակետից:

Վարչապետի հարցին՝  թե այդ դեպքում  ինչու՞ են միջանկյալ լուծում տալիս, միգուցե պետք է վերջնական լուծում տալ:

«Գիտեք ինչ, մենք բազմաթիվ կիսատ-պռատ քայլեր ենք անում, չհամոզված լինելով, որ դա ճիշտ է: Ես այս պահին չեմ ուզում ձեր որոշումը կանգնացնել, բայց եթե վստահ չեք, որ սա օգուտ է տալու, գուցե չանենք, մտածենք, թե վերջնական ինչ քայլեր կարող ենք անել»,- ասաց Կարեն Կարապետյանը:

Լևոն Մկրտչյանը  նկատեց, որ պրոցեսը սկսվել է և սխալ կլինի այն դադարեցնել, քանի որ բուհերի մի մասն արդեն հիմնադրամ է ձևավորել:

«Ես համոզված եմ, որ բուհական համակարգը կարիք ունի լուրջ բարեփոխումների: Ես կարծում եմ՝ համալսարանների այն քանակը,  որ կա Հայաստանում, ուղղակի հարվածում է կրթության որակին: Խոսքը վերաբերում է և պետական, և ոչ պետական բուհերին»,- ասաց Լևոն Մկրտչյանը:

Վարչապետը ընդունեց՝ ասելով, որ համաձայն է նախարարի հետ, բայց միևնույն ժամանակ նշեց, որ եթե գտնում են՝ լավագույն լուծումը չէ, ապա կարելի է մեկ շաբաթ էլ մտածել:

«Նախագիծն ընդունված է, բայց մինչև վերջ` չբավարարված»,- ասաց Կարեն Կարապետյանը: