«Երեխաները հավատում են հրաշքների, գրքի հերոս հսկան՝ նույնպես». Նարինե Աբգարյան

Մշակույթ 18:36 22/09/2016 Հայաստան

Ռուսաստանաբնակ Նարինե Աբգարյանն այսօր հայ փոքրիկ ընթերցողին ներկայացրեց «Հսկան, որը երազում էր ջութակ նվագել» գիրքը: Այն ստեղծվել է համանուն մուլտիպլիկացիոն ֆիլմի սյուժեի վրա, որը 1986 թվականին «Հայֆիլմի» համար գրել էր սցենարիստ Արմեն Վաթյանը:

Հեղինակը լրագրողների հետ զրույցում նշեց, որ գիրքը հավասարապես նաև Արմեն Վաթյանինն է:

«Այստեղ փոքրիկների համար ներկայացված է հսկայի հզոր ուժը, որը ոչ թե քանդելու, այլ ստեղծելու համար է: Երեխաները հավատում են հրաշքների, գրքի հերոս հսկան՝ նույնպես: Իմ կարծիքով` հենց այդ հրաշքի գաղափարն էլ ամենաշատը դուր կգա փոքրիկներին»,-ասաց Նարինե Աբգարյանը:

Ներկայումս հեղինակն աշխատում է Ղարաբաղյան պատերազմի մասին պատմող գրքի վրա. «Այդ պատերազմը ես էլ եմ ապրել, զգացել, այդ ժամանակ բնակվում էի Հայաստանում: Նոյեմբերին նախատեսում եմ գնալ Արցախ՝ գրքիս համար լրացուցիչ նյութեր հավաքելու»:

Իսկ իրեն գրողն այսպես ներկայացրեց. «Երևի ես բախտավոր մարդ եմ, ես անում եմ այն, ինչ ամենաշատն եմ սիրում՝ գրում եմ ու դրանով երջանիկ եմ»:

Շնորհանդեսին ներկա գրքի պլաստիրինե նկարազարդումների հեղինակն նկարիչ Լևոն Աբրահամյանն էլ ասաց, որ սիրով է աշխատում մանկական գրքերի հետ. «Գրքերի այսպիսի նկարազարդումներն իր տեսակի մեջ նորություն են: Նկարներն ամբողջությամբ ստեղծվել է պլաստիրինից: Մեծ սիրով եմ աշխատել ամեն մի դելատի վրա, քանի որ աշխատանքիս գերխնդիրն է նկարների միջոցով բարություն հասցնել երեխաներին»:

Նշենք, որ շնորհանդեսին ներկա փոքրիկների համար Նարինե Աբգարյանը գրքից հատվածներ ընթերցեց, զրուցեց փոքրիկների ու նրանց ծոնղների հետ:

Հարակից հրապարակումներ`

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: