Ձեր վստահելի աղբյուրը

«Ես շարունակում եմ կատարել իմ պարտականությունները, հրաժարական տալու խնդիր չկա, քանի որ մենք ներկայումս ժամանակավոր զբաղեցնում ենք այս պաշտոնը՝ որպես պաշտոնակատարներ»,- այս մասին այսօր լրագրողների հետ հանդիպման ժամանակ հայտարարեց ՀՀ էկոնոմիկայի նախարարի պաշտոնակատար Արծվիկ Մինասյանը և լրագրողներին առաջարկեց մտնել աշխատասենյակ և ծանոթանալ իր ծանրաբեռնված գրաֆիկի հետ:

«Ըստ Սահմանադրության, ըստ օրենքի, կառավարության կազմավորումը  ենթադրում է ՀՀ նախագահի հրամանագիր՝ վարչապետի առաջարկությամբ, որից հետո կհամարվի նախարարը նշանակված է, թե ոչ: Այս պահին ես էկոնոմիկայի նախարարի պաշտոնակատար եմ, շարունակելու եմ այնքան ժամանակ, քանի դեռ չի եղել նոր հրամանագիր»,- ասաց Արծվիկ Մինասյանը:

«Առաջին իսկ օրից սկսած ես դրել եմ կադրային քաղաքականության երեք հիմնական սկզբունք՝ պրոֆեսիոնալիզմ, հայրենասիրություն և պատասխանատվություն: Ինձ համար սկզբունքային է եղել, որ ղեկավարի նկատմամբ հարգանքը դառնա մոտիվացիան, այլ ոչ թե  ղեկավարի կողմից խիստ կամ որոշ շրջանակների համար կոպիտ, ոչ պատշաճ վարքագիծը:Ես շարժվել են այդ մոտեցմամբ, այդ սկզբունքով և շնորհակալ եմ, որ համակարգի աշխատակիցներից շատերը  հարգել են այդ մոտեցումը: Ես իմ մոտեցման տերն եմ, կրողն եմ և հետագայում էլ այդպես շարունակելու եմ»,- նշեց Արծվիկ Մինասյանը:

Նրա խոսքերով՝ այս յոթ ամիսներին նախարարությունն աշխատել է գերծանրաբեռնված:

Նշենք, որ ասուլիս ժամանակ նախարարի պաշտոնակատարը մանրամասն ներկայացրեց իր ղեկավարած ոլորտի ձեռքբերումները, յոթ ամիսների աշխատանքների արդյունքները:

«Որպես ՀՅԴ-ի ներկայացուցիչ, ինձ և մեր քաղաքական ուժի համար մեծ նշանակությունի ունի այն, որ բարձր պաշոտն զբաղեցրած անձը պետք է հանդես գա հաշվետվությամբ, ներկայացնի իր պաշտոնավարման ընթացքում արածները, արդյունքներն ու ակնկալիքները»,- նշեց Արծվիկ Մինասյանը:

«Կարծում եմ՝ սա կարող է դառնալ մեր հասարակական, քաղաքական մշակույթի մեջ կարևոր ուղղություն»,- հավելեց նա:

Արծվիկ Մինասյանի խոսքերով՝ նախարարության հիմնական խնդիրները թվով 30-ն են, տարիների ընթացքում նախարարության կազմում միավորվել են շուրջ 13 գերատեսչությունների լիազորություններ: Ըստ նրա՝ այսօր գուցե արտաքինից չեն երևում նախարարության առջև ծառացած խնդիրները, բայց ներսից շատ ավելի ակնառու և ավելի մեծ ծավալներով դրանք իրականացվում են:

«30 հիմնարար ոլորտները, որոնք դրված են նախարարության առջև որպես հիմնական խնդիրներ, ակնհայտորեն ծավալուն են, խորքային են և, բնականաբար, պահանջում են նաև համարժեք լիազորություններ: Պարզ է նաև, որ նախարարությունը համապատասխան լիազորություններով ամբողջությամբ օժտված չէ, նաև ֆինանսավորումն էլ բավարար չէ 30 ուղղություններով խնդիրները արդյունավետ  լուծելու»,- նշեց Արծվիկ Մինասյանը: