Ձեր վստահելի աղբյուրը

ՀՀ էկոնոմիկայի նախարարի պաշտոնակատար Արծվիկ Մինասյանին տարբեր ուղղություններով առաջարկ է եղել:

«Ես՝ որպես ՀՅԴ-ի կողմից առաջադրված թեկնածու, բնականաբար, այդ առաջարկությունը քննարկման առարկա եմ ակնկալում դարձնել կուսակցության Գերագույն մարմնում, որից հետո արդեն մեր մոտեցումը կներկայացնենք»,- լրագրողների հետ հանդիպման ժամանակ ասաց Արծվիկ Մինասյանը՝  պատասխանելով հարցին, թե ճիշտ են մամուլի այն հրապարակումները, որ իրեն առաջարկվել է բնապահպանության նախարարի պաշտոնը:

Ինչ վերաբերում է էկոնոմիակայի նախարարությունում աշխատանքը շարունակելուն, նախարարի պաշտոնակատարը նշեց, որ եթե կառավարության երեկվա հավանության արժանացած օրենքի նախագիծն ընդունվում է, ակնհայտ է, որ էկոնոմիկայի նախարարությունը չի լինում. «Հետևաբար, անկախ նրանից  ցանկանում եք, թե ոչ, չկա այդպիսի նախարարություն: Ես երեկ էլ եմ ասել, որ ինձ համար ընդունելի չէ «էկոնոմիկա» բառը հանել նախարարության անվանման միջից»:

Շարունակելով խոսքը Արծվիկ Մինասյանը նշեց. «Այո, պարոն վարչապետը նոր դիրքում, նոր խնդիրների մասով այլ անձի տեսնելու ցանկություն է հայտնել: Ես որևէ ամբիցիա կամ ձգտում չունեմ ամեն գնով պահպանելու իմ դիրքերը: Առավել ևս, մեր նպատակը ոչ թե անպայման և ամեն գնով տվյալ դիրքում մնալն է, այլ նպաստել, որ այն հիմնական խնդիրները, նպատակները, որոնք ձևակերպված են քաղաքական համաձայնագրում, որոնք բխում են սահմանադրական փոփոխություններից և բերում են մեր երկրի տնտեսության զարգացմանը,  անկախ նրանից, որտեղ ենք լինելու, պետք է աջակցենք: Իմ սկզբունքը դա է, ես գոհ ու շնորհակալ եմ բոլոր նրանց, որոնք աջակցել են ինձ այս ընթացքում»:

Նա դրական է համարում այն, որ կառավարությունում ակտիվ քննարկումներ են ընթանում, գուցե որոշ պահեր հրապարակման համար չեն, այլ միայն աշխատանքային են, բայց վարչապետի կողմից որևէ անձի վիրավորելու միտում նա չի տեսնում: Ըստ նրա՝  եթե կառավարության նիստում վարչապետի ու նախարարների միջև ակտիվ  քննարկում է տեղի ունենում,  տեսակետների բախում է լինում, ապա դրանից շահում է տվյալ որոշումը, հասարակությունը:

Հարցին, թե ճիշտ են այն տեղեկությունները, թե վարչապետը չի ցանկանում աշխատել դաշնակցական նախարարների  հետ, Արծվիկ Մինասյանը հերքեց այդ տեղեկությունները. «Նման բան չկա, այպիսի թեմա չկա, չի քննարկվում,  հարաբերությունները զուտ աշխատանքային են, անձնական սիմպատիա կամ անտիպատիա ուղղակի չկա»:

Ինչ վերաբերում է իր և վարչապետի հարաբերություններին, Արծվիկ Մինասյանն ասաց, որ չկա որևէ լարվածություն, որևէ կոնֆլիկտ, կա բնականոն աշխատանքային պրոցես:

«Վստահ եմ, որ թե ՀՅԴ ԳՄ-ն, թե ՀՀԿ ղեկավար մարմինը քաղաքական համագործակցության հուշագիրը կյանքի կոչելու պատրաստակամություն ունեն, թվացյալ լարվածությունն ավելի շատ առանձին հատվածների ցանկությունն է, քան իրականում կա: Ավելի լավ չէ՞, որ կառավարության նիստերը լինեն բաց երկխոսության ձևով: Ես իսկապես շնորհակալ եմ, որ վարչապետն ունի հստակ տեսակետ բիզնես հանրության բեռը թեթևացնելու, բյուրոկրատիան նվազեցնելու համար»,- ասաց նա:

Ինչ վերաբերում է մի քանի տարի առաջ իր արած այն հայտարարությանը, թե Կարեն Կարապետյանը լավ մենեջեր է, բայց վատ քաղաքական գործիչ, Արծվիկ Մինասյանն ասաց, որ այդ  հայտարարությունն արվել է այն ժամանակ, երբ Կարեն  Կարապետյանը քաղաքապետ էր: