Ձեր վստահելի աղբյուրը

«Հայաստանի նորագույն պատմության ընթացքում սեպտեմբերի 21-ին կայացած ռազմական շքերթն ամենահզոր զորահանդեսն է եղել ոչ միայն ցուցադրված զինատեսակների տեսանկյունից, այլ իրենց հզորության տեսանկյունից:  Վերջին 6-7 տարում հայկական բանակի մարտունակությունը բարձրացել է մի քանի անգամ»,- լրագրողների հետ հանդիպմանն ասաց ՀՀ պաշտպանության նախկին նախարար Վաղարշակ Հարությունյանը:

Նա ընդգծեց, որ Հայաստանը տարածաշրջանում ունի ամենալավ հակաօդային պաշտպանությունը, ինչը դարձնում է անիմաստ Ադրբեջանի ծախսերը  իրենց ռազմաօդային ուժերի զարգացմանն ուղղված:

«Ապրիլյան գործողությունները դա ցույց տվեցին: Մեր հակաօդային պաշտպանությունը հզոր է, քանի որ մենք 1992 թվականից Ռուսաստանի հետ համատեղ այդ համակարգն իրականացնում ենք»,- հավելեց նա:

Վ. Հարությունյանի խոսքով, զորահանդեսում ցուցադրվեց նոր համակագ, որը C-300 մի մակարդակ ցածր է, բայց էֆեկտիվ է զորքերի հակաօդային պաշտպանության ապահովման տեսանկյունից: Դա «Բուկ» զենիթա-հրթիռային համալիրն է:

Խոսելով ռադիոհետախուզության ու ռադիոէլեկտրոնային պայքարի բազմաֆունկցիոնալ «Ինֆաունա» համալիրի մասին,  նա ասաց, որ սա բերում է պատերազմը  նոր որակի և ապահովում է հայկական զորքերի անվտանգությունը,  բերում է նրան, որ Ադրբեջանի  բանակի ղեկավարման համակարգը կորցնում է իր մարտունակությունը:

«Այս համակարգն ունի այդպիսի հնարավորություններ, որպեսզի խափանի իրենց ղեկավարման համակարգի գործողությունները: Բացի դրանից, շատ էֆեկտիվ միջոց է անօդաչու թռչող սարքերի դեմ»,- ասաց նախկին նախարարը:

Պատասխանելով հարցին, թե ՌԴ-ն խոսվում է այն մասին, որ  պետք է պահպանվի հավասարակշռություն,  այդ դեպքում ինչո՞ւ է միայն Հայաստանին տրամադրել շատ կարևոր զինատեսակներ, Վ. Հարությունյանն ասաց. «Սա Հայաստանի ճշգրիտ արտաքին քաղաքականության արդյունքն է,  հայ-ռուսական դաշնակային հարաբերությունների ապացույցն է: «Իսկանդեր» որևէ այլ պետության չի վաճառում»:

Ըստ Վ. Հարությունյանի, այս զենքը նաև զսպում է Ադրբեջանին իր անխելք քայլերից:

«Դու պետք է ունենաս միջոցներ, որոնք կստիպեն քո հակառակորդին հասկանալ, որ եթե դիմի քայլերի, կստանա երաշխավորված պատասխան, որը կբերի իր ոչնչացմանը՝ տնտեսական և ռազմական: Եթե քո հետևից չկա ուժ, չես կարող բանակցել և հասնել որևէ մի նպատակի: Սա աջակցում է նաև Ղարաբաղի հարցի լուծմանը, աջակցում է, որպեսզի կանխի լայնածավալ պատերազը: Բնականաբար, Ադրբեջանը փորձելու է հակամիջոց գտնել: Հայաստանն այն կօգտագործի միայն լայնածավալ պատերազմի ժամանակ»,- ասաց նա:

Հարցին, թե  որքանո՞վ եք վստահ, որ ՌԴ-ն  Ադրբեջանին չի տվել դրանից պաշտպանելու համակարգեր, Վ. Հարությունյանը պատասխանեց. «Վստահ եղեք: Պետք է հասկանալ Ռուսաստանի շահերը տարածաշրջանում:  Ռուսաստանի շահերից է բխում, որպեսզի այստեղ պատերազմ չլինի, որովհետև եթե պատերազմ է լինում տարածաշրջանում, Ռուսաստանը կորցնում է իր ազդեցությունը, ուժեղացնում են իրենց ազդեցությունները Թուրքիան և այլ պետություններ»:

Միաժամանակ Վ. Հարությունյանն ասաց, որ զորահանդեսին ամեն ինչ չի ցուցադրվել, ինչ ունի Հայաստանը. «Մենք ունենք ավելի շատ ու էֆեկտիվ զենք, բայց կա պետական և ռազմական գաղտնիք հասկացողությունը»:

Նա նաև նշեց, որ ապրիլից  հետո գերտերություններն արդեն հաշվի կառնեն, որ ադրբեջանական բանակն ի վիճակի չէ ռազմական ճանապարհով լուծել խնդիրը, դա կմտցնի փոփոխություններ իրենց դիրքերում ղարաբաղյան հակամարտության հարցի վերաբերյալ: