Ձեր վստահելի աղբյուրը

Ադրբեջանում  սահմանադրական փոփոխությունների իրականացումից հետո որևէ դրական տեղաշարժ չի ակնկալվում: Լրագրողների հետ հանդիպմանը, վերլուծելով Ադրբեջանում նախօրեին տեղի ունեցած հանրաքվեի արդյունքներն ու հնարավոր փոփոխությունները, նման տեսակետ հայտնեց  քաղաքական գիտությունների թեկնածու, ադրբեջանական հարցերով փորձագետ Անժելա Էլիբեգովան:

Նա հիշեցրեց, Վենետիկի հանձնաժողովի անդամները բացասական կարծիք էին հայտնել այդ երկրի սահմանադրական փոփոխությունների նախագծի մասին, ինչը սակայն չէր անհանգստացրել իշխանություններին: Ընդդիմությունը հայտարարում է հանրաքվեի մասնակցության և «կողմ» քվեարկած ցուցանիշների իսկության կասկածների վերաբերյալ, իշխանություններին մեղադրում ընտրախախտումներ կատարելու մեջ:

Էլիբեգովան նշեց, որ փոփոխությունները վերաբերում էին այդ երկրի մայր օրենքի 29 դրույթներին, որոնցից մի քանիսն առավել կարևոր էին:

«Նախագահն արդեն 5 տարվա փոխարեն կղեկավարի 7 տարի: Այստեղ ի՞նչն է հետաքրքիր, հանվում է նաև տաիքային սահմանափակումը, գործող սահմանդրության համաձայն Ադրբեջանի նախագահ կարող էին դառնալ 35 տարեկան և բարձր քաղաքացիները: Տարիքային սահմանափակումը հանվել է նաև պատգամավորների համար, հիմա բոլոր չափահաս քաղաքացիները կարող են ընտրվել և նախագահ, և պատգամավոր»,-կատարված փոփոխությունները մանրամասնեց բանախոսը:

Քաղաքագետը համարում է, որ այս փոփոխությունները Ադրբեջանի նախագահի իշխանությունն ամրապնդեցին:

«Այժմ նախագահը կարող է նշանակել փոխնախագահներ, որոնք ենթարկվում են նախագահին, անձեռնմխելի են: Մինչ այս  սահմանված էր, եթե նախագահն ի վիճակի չէ պաշտոնավարել, ապա իրավասությունները ստանձնում է երկրի վարչապետը, իսկ հիմա դրանք անցնում են փոխնախագահներին»,-ներկայացրեց Ա. Էլիբեգովան:

Փոփոխություններով նախագահը հնարավորություն է ստանում ցրել մեջլիսը, եթե մեկ տարվա ընթացքում երկու անգամ այն չի հաստատում կառավարության կազմը:

«Փոփոխություններն առավել շատ ուղղված են իշխանության ամրապնդմանը, ոչ խոսքի ազատության, ոչ մարդու իրավունքների պաշտպանության հարցում որևէ պրոգրես չեն ապահովելու»,-կարծիք հայտնեց քաղաքագետը: