Ձեր վստահելի աղբյուրը

ՀՀ քննչական կոմիտեի Արարատի մարզային քննչական վարչության Մասիսի քննչական բաժնում հարուցվել է քրեական գործ՝ Նորամարգ գյուղում տեղի ունեցած ավազակային հարձակման դեպքի առթիվ:

Քննչական կոմիտեի լրատվական ծառայությունից տեղեկացնում են, որ ձեռնարկված անհետաձգելի գործողությունների արդյունքում պարզվել է հանցագործություն կատարած անձի ինքնությունը, որը ձերբակալվել է:

Նախնական տվյալներով՝  սեպտեմբերի 26-ին՝ ժամը 09:30-ի սահմաններում, հանցագործություն կատարած անձը, ուրիշի գույքը ավազակային հարձակմամբ հափշտակելու դիտավորությամբ, մուտք է գործել Արարատի մարզի Նորամարգ գյուղում գտնվող խանութներից մեկը և առողջության համար վտանգավոր բռնություն գործադրել  սեփականատիրոջ նկատմամբ:

Մասնավորապես՝  օղու շշով  հարվածել է նրա գլխին, որն սկսել է բղավել, ինչից հետո տղամարդը դիմել է փախուստի: 

Դեպքի առթիվ սեպտեմբերի 26-ին Մասիսի քննչական բաժնում հարուցվել է քրեական գործ՝ ՀՀ քրեական օրենսգրքի 175-րդ հոդվածի 2-րդ մասի 4-րդ կետի հատկանիշներով: Նույն օրը խանութի սեփականատերը ճանաչվել է տուժող:

Ըստ աղբյուրի, քրեական գործով ձեռնարկված միջոցառումների արդյունքում պարզվել է հանցագործություն կատարած անձի ինքնությունը, և նշված հանցագործությունը կատարելու կասկածանքով ձերբակալվել է Արմավիրի մարզի Երասխահուն գյուղի բնակիչ, 25-ամյա երիտասարդ։  Վերջինը հարցաքննվել է և ցուցմունք տվել դեպքի շուրջ։

Քրեական գործի նախաքննությունը շարունակվում է, ձեռնարկվում են անհրաժեշտ քննչական գործողություններ՝ դեպքի բոլոր հանգամանքների բազմակողմանի, օբյեկտիվ և լրիվ հետազոտումն ապահովելու ուղղությամբ, նշանակվել է դատաբժշկական փորձաքննություն։