Ձեր վստահելի աղբյուրը

Ազգային ժողովի արտահերթ նիստում «Հայաստանի Հանրապետության կառավարության կառուցվածքի մասին» ՀՀ օրենքում փոփոխություն կատարելու մասին  օրենքի նախագիծը երկրորդ ընթերցամբ և ամբողջությամբ ընդունելու մասին հարցի քննարկմանը հիմնական զեկուցող արդարադատության նախարար Արփինե Հովհաննիսյանն ասաց, որ  ներկայացնում է այն տարբերակը, որին քվերակել են առաջին ընթերցման ռեժիմով:

Նա նշեց, որ առաջին ընթերցման ժամանակ պատգամավորների՝ Էդ. Շարմազանովի, Հ. Բաբուխանյանի, Հ.Բագրատյանի կողմից առաջարկներ էին ներկայացվել:

«Այդ առաջարկությունները քննարկման առարկա դարձվել են և խնդիրը ոչ թե այդ առաջարկությունների հետ սկզբունքային անհամաձայնությունն է, այլ  ինստիտուցիոնալ առումով այս պահին կառավարության այն դիրքորոշումը, որ անվանումների մասով պատկերացումներն այդպիսին են,  որովհետև կա ծրագրի հետ կապված որոշակի տեսլական»,- ասաց նախարարը՝ հավելելով, որ այդ առաջարկությունները քննարկման առարկա դարձվել են հետագայում ինստիտուցիոնալ վերանայման շրջանակներում դրանց անդրադարձ կատարելու համար:

Արփինե Հովաննիսյանն ընդգծեց, որ կառավարությունն այս պահի դրությամբ  այս կառուցվածքով է պատկերացնում իր ծրագրերի իրականացումը:

Պատգամավոր Հրանտ Բագրատյանն իր ելույթում ասաց. «Բացատրություն չկա, մենք արել ենք նորմալ առաջարկություն ձեզ:  Ասում եք՝ քննարկել ենք, ինստիտուցիոնալ առումով հարմար է, հետո տեսլականը չի բռնում, հետո կբերենք… Սա ինձ համար անհասականալի է: Սա վատ մեկնարկ է: Ուզում եմ զգուշացնել, որ մենք լուրջ բաներ ենք ասում: Սա կարող է ձախողման սկիզբ լինել կամ էլ եթե ասում եք մեր տեսլականն ունենք, սկզբում ծրագիրը բերեիք, հետո կառուցվածքը: Այդպես չի լինում: Նման գործերը, հավատացեք ինձ և  իմ փորձին, այդ ձևով չեն արվում»: