Ձեր վստահելի աղբյուրը

Ազգային ժողովն արտահերթ նիստում քննարկում է Հարկային նոր օրենսգրքի նախագիծը երկրորդ ընթերցմամբ ընդունելու հարցը:

Հիմնական զեկուցող Պետական եկամուտների կոմիտեի փոխնախագահ Վախթանգ Միրումյանը հայտնեց, որ առաջինից երկրորդ ընթերցում ընկած ժամանակահատվածում բազմաթիվ առաջարկություններ են ստացվել պատգամավորներից և գործարարներից: Բացի այդ, ըստ նրա, ՀՀ  կառավարությունում քննարկումների ժամանակ նոր առաջարկություններ են ձևավորվել, որոնց  հիման վրա նախագիծն էապես լրամշակվել է:

«Ցանկանում եմ նշել, որ պատգամավորների կողմից ներկայացված առաջարկությունների գերակշիռ մասն ամբողջությամբ կամ մասնակիորեն ընդունվել են»,- ընդգծեց նա:

Վախթանգ Միրումյանը ներկայացնելով եկամտային հարկի դրույքաչափերը՝ նշեց, որ երկրորդ ընթերցման ներկայացված տարբերակում եկամտային հարկի սանդղակն էապես վերանայվել է: «Վերանայվել է հետևյալ ուղղությամբ. 23 տոկոս դրույքաչափ է առաջարկվում կիրառել մինչև 150 հազար դրամ աշխատավարձերի պարագայում՝  նախագծով նախատեսված մինչև 120 հազար դրամ շեմի դեպքում: Դա նշանակում է, որ գործող 24.4 և 26 տոկոս դրույքաչափերի փոխարեն 23 տոկոս է կիրառվելու 120-150 հազար միջակայքում գտնվող աշխատավարձերի համար»,- ասաց նա:

Երկրորդ դրույքաչափը՝  28 տոկոսը, ըստ Վ.Միրումյանի, առաջարկվում է կիրառել ոչ թե 120 հազարից մինչև 1 մլն դրամ միջակայքի համար, ինչպես նախատեսված էր առաջին ընթերցման տարբերակում, այլ՝ 150 հազարից 2 մլն դրամ միջակայքի համար:

«Իսկ 2 մլն դրամից ավելի աշխատավարձի դեպքում առաջարկվում է պահպանել այսօրվա գործող դրույքաչափը, որը կազմում է 36 տոկոս»,- նշեց ՊԵԿ փոխնախագահը:

Ըստ նրա՝  թե գործող օրենքով, թե նախագծի նախնական տարբերակով եկամտային հարկի արդյունավետ դրույքաչափը կազմում է 25.3 տոկոս, իսկ այժմ առաջարկվում է այդ դրույքաչափը նվազեցնել մինչև 24.9 տոկոս:

Դա նշանակում է, որ մինչև 280 հազար դրամ աշխատավարձ ստացողները, իսկ նշված անձանց  թիվը ՀՀ-ում կազմում է 89,8 տոկոսը կամ 550 հազար քաղաքացի ունենալու են եկամտային հարկի գծով տնտեսումներ. «Այսինքն՝ դրույքաչափերի արդյունավետ նվազեցման արդյունքում 550 հազար քաղաքացի եկամտահարկի տնտեսում կունենա»:

Իսկ դրանից բարձր աշատավարձի դեպքում եկամտահարկի դրույքաչափը բարձրանում է, բայց ոչ այն չափով, ինչ չափով առաջարկվում էր առաջին ընթերցմամբ ընդունված նախագծով:

Լրամշակված տարբերակում, ըստ Վ.Միրումյանի, այն կազմում է առավելագույնը 1,72 տոկոսային կետ և վերաբերելու է միայն 2 մլն դրամ և ավելի բարձր աշխատավարձ ստացողներին:

Երկրորդ փոփոխությունը, ըստ Վախթանգ Միրումյանի, վերաբերում է շրջանառության հարկի շեմին, որը նախագծի նախնական տարբերակում սահմանված էր  40 մլն դրամ, իսկ լրամշակված տարբերակով առաջարկվում է շեմը սահմանել 58.35 մլն դրամ, ինչպես նախատեսված էր մինչև շեմի բարձրացումը:

«Շեմի բարձրացումն ի սկզբանե հայտարարված էր որպես ժամանակավոր միջոցառում: Եթե մենք անգամ Հարկային օրենսգրքով որևէ բան չփոխենք, այսօրվա օրենքով նշանակում է, որ 2019 թվականի հունվարի 1-ից մենք ունենալու ենք տարեկան 58.35 մլն դրամի շեմ»,- ասաց նա:

Նա միաժամանակ նշեց, որ այն տրամաբանությունը, որը դրված էր շրջանառության հարկի շեմի բարձրացման հիմքում՝ տեսել են, որ այս մեկ տարվա ընթացքում  այն չի ծառայել իր նպատակին: Ավելին, շատ դեպքերում ներկայումս այն խոչընդոտում է փոքր տնտեսվարող սուբյեկտների գործունեությանը՝ նրանց դնելով ավելի պակաս մրցակցային պայմանների մեջ:

«Մենք ենթադրում էինք, որ շեմը բարձրացնելով կունենայինք  շրջանառությունների հայտարարագրման իրական ծավալների աճ, քանի որ ի սկզբանե կար այն ենթադրությունը, որ նման շեմը չի նպաստում, որպեսզի ՓՄՁ-ներն իրապես հայտարարագրեն իրենց իրացման շրջանառությունը և մոտենան այդ շեմին: Ցավոք, պետք է փաստենք, որ իրավիճակը չի փոխվել:  Այսօր ունենք իրավիճակ, երբ 46 հազար տնտեսվարողներ տարեկան հայտարարագրել են մինչև 10 մլն դրամ շրջանառություն, 54 հազար տնտեսվարողներ ունեն մինչև 30 մլն դրամ շրջանառություն, ինչը բավական հեռու է 115 մլն-ի շեմից: Իսկ իրականում ի՞նչ ունեցանք, ունեցանք իրավիճակ, երբ հարաբերականորեն բարձր շրջանառություն ունեցող անձինք, որոնք մինչ այդ գործում էին ԱԱՀ-ի դաշտում, հնարավորություն ունեցան թափանցել շրջանառության հարկի դաշտ և իրենց ուժեղ կարողությունները թելադրել: Այդ պատճառով առաջարկվում է վերանայել 40 մլն դրամի շեմը, այն սահմանել 58.35 մլն դրամ, այնպես, ինչպես գործում էր մինչև շեմը բարձրացնելը»,-նշեց ՊԵԿ փոխնախագահը:

Մանրամասները՝ տեսանյութում: