Ձեր վստահելի աղբյուրը

Անգլիական «Մանչեսթեր Յունայթեդը» շարունակում է նախապատրաստվել Եվրոպա լիգայի խաղարկության խմբային փուլի ուկրաինական «Զարյայի» հետ վաղը կայանալիք հանդիպմանը:

Ակումբի պաշտոնական կայքը հետաքրքիր փաստեր է հրապարակել Հայաստանի ֆուտբոլի ազգային հավաքականի և թիմի կիսապաշտպան Հենրիխ Մխիթարյանի մասին: Մասնավորապես հիշեցում է կատարվում, որ հայ ֆուտբոլիստը Դոնեցկի «Շախտյորում» հանդես եկած տարիներին «Զարյայի» հետ կայացած 3 խաղում դարձել է 4 գոլի հեղինակ: Հուսանք, որ Ժոզե Մոուրինյոն մեկնարկային կազմի ընտրության հարցում այս հանգամանքը հաշվի կառնի և ճիշտ որոշում կկայացնի:



Մյուս կարևոր իրադարձությունն այն է, որ այսօր անգլիական ակումբն իր մարզումն է անցկացրել Քերինգթոնում, որին մասնակցել է նաև Հենրիխ Մխիթարյանը: Ամենայն հավանականության, Մխիթարյանին վաղը կտեսնենք խաղադաշտում:



«Զարյայի» հետ հանդիպումը, իհարկե, կարևոր է, սակայն անգլիական մամուլի ուշադրության կենտրոնից չի վրիպել, որ Մանչեսթերում հայ ֆուտբոլիստը երթևեկում է թանկարժեք մեքենայով: Նրանք անգամ հրապարակել են մեքենայի արժեքը: Պարզվում է, Մխիթարյանը վարում է «Մարսեդես» S դասի AMG կուպե ավտոմեքենա՝ 265,000 դոլար արժողությամբ: