Ձեր վստահելի աղբյուրը

Գործադիրի հավանությանն է արժանացել Հայաստանի Հանրապետության 2017թ. պետական բյուջեի նախագիծը:

ՀՀ ֆինանսների նախարար Վարդան Արամյանը նշեց, որ ամենակարևոր սկզբունքը, որն ամրագրվել է հաջորդ տարվա բյուջեով, հարկաբյուջետային և պարտքի կայունությունն  է:

Նախարարի խոսքերով՝ 2014-2015 թվականներին ունեցել ենք պետական պակասուրդի բավական բարձր մակարդակ՝ 4.8 տոկոս: Եվ այս տարվա արդյունքներով, ըստ նրա, ամենայն հավանականությամբ, կունենանք  5.9 տոկոսանոց պակասուրդ: Արդյունքում՝ ավելացել է արտաքին պարտք-ՀՆԱ հարաբերակցությունը:

«Սա պարտքի ստեղծման հիմնական աղբյուրն է: Մեզ մոտ պարտքը երկու տարիների ընթացքում՝ 2014-2015 թվականներին 43.7 տոկոսից բարձրացել է և այս տարեվերջին 54.4 տոկոս կկազմի: Բնականաբար, հաջորդ տարիներին պետք է լինենք ավելի պահպանողական, որպեսզի թույլ չտանք պարտքի գերաճ»,- մեկնաբանեց Վարդան Արամյանը:

Նախագծով եկամուտների մասով նախատեսվում է 1 տրիլիոն 135 միլիարդ դրամ, ծախսերի մասով՝ 1 տրիլիոն 360 միլիարդ, դեֆիցիտը՝ 150,1 միլիարդ դրամ՝ 2.8 տոկոս: Նախագծով նախատեսվում է նաև ՀՆԱ-ի 3,2 տոկոս աճ:

Անդրադառնալով պետբյուջեի նախագծին՝  Կարեն Կարապետյանը ասաց. «Մենք բավականին կոշտ բյուջե ենք նախատեսում 2017 թվականին, թվերը խոսում են դրա մասին: Մոտ 70 միլիարդ նախատեսում ենք եկամուտների աճ և մոտ 100  միլիարդ՝ ծախսերի նվազեցում: Այն բոլոր հարցադրումները, որ հնչեցնում ենք կառավարման, ծախսերի նվազեցման վերաբերյալ, դրանք շատ ակտուալ են»:

ՀՀ ֆինանսների նախարարին հանձնարարվեց նաև անհրաժեշտության դեպքում նախագծում կատարել շտկումներ և ներկայացնել ՀՀ կառավարության աշխատակազմ, որտեղից նախագծի լրամշակված տարբերակը սահմանված կարգով կներկայացվի ՀՀ Ազգային ժողով: