Ձեր վստահելի աղբյուրը

Ազգային ժողովի արտահերթ նիստում քվեարկության դրվեց «Հայաստանի Հանրապետության Հարկային օրենսգրքի» նախագիծն երկրորդ ընթերցմամբ  ընդունելու մասին հարցը:

Նախքան քվեարկությունը,  ելույթ ունեցավ ՕԵԿ խմբակցության ղեկավար Հեղինե Բիշարյանը.
«Երեկ դատարկ դահլիճում քննարկվել է հաստափոր նախագիծը: Բավականին նոր փոփոխություններով քննարկման առարկա պետք է դառնար ոչ միայն դահլիճում գտնվող մի քանի պատգամավորների կողմից, նաև մեծ ու փոքր բիզնեսմենների, նոր կառավարության կողմից: Ստացվում է այնպես, որ ձևավորվել է նոր կառավարություն, բայց աշխատում ենք հին ոճով: Բերել այստեղ փաստաթղթեր, այն էլ հարկային փաթեթը, որն այստեղ նստած մարդկանց գրեթե  80 տոկոսի հետ առնչվում է, մեր պատգամավորները, վստահ եմ, որ չեն էլ հասցրել կարդալ: Բավական երկար ժամանակ էր պետք ուսումնասիրել և այստեղ կարծիքներ հայտնել: Ստացվում է, որ մենք կանգնած ենք կոտրած և հին տաշտակի առջև, ձեռագիրը բացարձակապես չի տարբերվում հնից: Նման հարկային փաթեթին մեր խմբակցությունը դեմ է քվեարկում և կոչ ենք անում մյուսներին նույնպես»:

«Ժառանգություն» խմբակցությունից Ռուբեն Հակոբյանն ասաց, որ սա կարևորագույն, ինչ-որ տեղ համակարգաստեղծ, տնտեսական քաղաքականությունն ուղղորդող փաստաթուղթ է, պատասախանատվություն է պահանջում:

«Մի բան հստակ է, որ այս փաթեթն ընդունում ենք, որովհետև ստիպած ենք»,- նշեց նա՝ հավելելով, որ չի մասնակցելու այս քվեարկությանը:

ԲՀԿ խմբացության ղեկավար Նաիրա Զոհրաբյանն ասաց, որ չի կարելի նման խաղի կանոն սահմանել, որն ուղղակիորեն կործանելու է փոքր և միջին ձեռներեցությունը:

«Հորդորում ենք ուղղակի չդնել քվեարկության այս նախագիծը: Չի կարելի նման անփույթ տեսքով նախագիծ ընդունել և սահմանել խաղի կանոն, որն ուղղակի կործանարար է լինելու Հայաստանում մնացած արդեն 1-2 տնտեսավարողի համար»,-  նշեց պատգամավորը: 

ԱԺ  նախագահ Գալուստ Սահակյանն ասաց. «Առաջին ընթերցումից հետո անընդհատ, պարբերաբար քննարկվել է , ներկայացվել Ազգային ժողով: Այսօր հիմա այս վերջին մոմենտն է, բազմաթիվ փոփոխություններ են տեղի ունեցել»:

Պատգամավոր Վահե Հովհաննիսյանի խոսքով, եղածի վրա բավականին փոփոխություններ արվել են:

«Արդյո՞ք մեր  նպատակը դա է՝ առաջին վատ տարբերակի վրա աշխատել, առաջինի համեմատ ունենալ ավելի լավ տարբերակ: Արդյոք դա բավարար է:՞ Կարծում եմ, ոչ: Մեր խնդիրը լրիվ այլ էր՝ գործարար միջավայրի փոփոխություն, բիզնեսի խրախուսում: Մենք չենք հասել այդ նպատակին: Կարծում եմ՝ սա շատ վատ մեսիջ է բիզնես դաշտին հատկապես նոր կառավարության ծրագիրը բերելուց առաջ: Մենք խաղում եք մանր, միջին բիզնեսի, բազմաթիվ այլ գործարարների  շահերի, իրավունքների, գուցե ճակատագրի հետ: Զգույշ պետք է քվեարկել»,- ասաց նա:

ՀՀԿ-ական պատգամավոր Խոսրով Հարությունյանն ասաց, որ  Ընտրական օրենսգրքից հետո սա ամենաքննարկված, բազմակողմանի ուսումնասիրված փաստաթուղթն է և, որ  քննարկումների արդյունքում բարելավումները  հիմնականում արդյունք են պատգամավորների կողմից բերված առաջարկությունների:

«Փաստաթուղթը բարելավված է ի օգուտ ձեռներեցության, ակնհայտ է: Կարծում եմ գործ ունենք քաղաքական կոմպրոմիսի հետ»,- ընդգծեց նա:

ՀՀԿ-ական պատգամավոր Վարդան  Այվազյանն ասաց, որ Հարկային օրենսգիրքը միայն վերջին ժամանակահատվածում՝ մոտ երկու ամսվա ընթացքում, քննարկվել է 25 անգամ, պատգամավորների կողմից արված 300 առաջարկությունից գերակշիռ մեծամասնությունն ընդունված է:

«Փոքր և միջին բիզնեսի մասով առաջարկությունների 99,9 տոկսն ընդունվել է: Առաջին ընթերցումից հետո հիմնարար փոխվել է, այլ որակի փաստաթուղթ է»,- նշեց նա: 

79 կողմ, 24  դեմ և 1 ձեռնպահ ձայներով երկրորդ ընթերցմամբ ընդունվեց «Հարկային օրենսգրքի» նախագիծը:

Մանրամասները՝ տեսանյութում: