Ձեր վստահելի աղբյուրը

USA Today ամերիկյան համազգային թերթն իր խմբագրական հոդվածում ամերիկացիներին կոչ է արել նախագահական ընտրություններում չքվեարկել հանրապետական թեկնածու Դոնալդ Թրամփի օգտին:

«Գազետա.ռու»-ն գրում է, որ թերթը 34 տարվա պատմության մեջ առաջին անգամ բացահայտ դեմ է արտահայտվել նախագահի թեկնածուին: Խմբագրության կարծիքով՝ Թրամփը բազմիցս ցույց է տվել, որ չունի նախագահին անհրաժեշտ խառնվածք, գիտելիք, տոկունություն ու ազնվություն:

Թերթը հանրապետականին մեղադրում է, որ նա «դավաճանել է» երկրի նախկին ղեկավարների դրած հիմքերը, որոնց թվում է ՆԱՏՕ-ին աջակցելը և «ռուսական ագրեսիային» ընդդիմանալը: Բացի դրանից նշվում է, որ Թրամփը հաճախ փոխում է դիրքորոշումը, որն անընդունելի է գերագույն հրամանատարի համար:

Թերթը քննադատել է նրան նաև այն բանի համար, որ «անհանդուրժողականության և այլատյացության» արշավ է կառուցում,  հրահրում է բացասական վերաբերմունք մեքսիկացիներ, մուսուլմանների և միգրանտների  հանդեպ, ինչպես նաև առաջարկել է ռուս հաքերներին հրապարակել իր մրցակից դեմոկրատ Հիլարի Քլինթոնի նամակները:

Լրատվամիջոցը նաև ընդգծել է, որ Թրամփի օգտին չքվեարկելու կոչը չի նշանակում անվերապահ աջակցություն Քլինթոնին, ով ևս ունի իր «թերությունները», բայց ոչ այնքան լուրջ, որքան միլիարդերինը: