Ձեր վստահելի աղբյուրը

Սրբազան Քահանայապետ Ֆրանցիսկոս Պապի Վրաստանում երկօրյա հյուրընկալության պատվին կազմակերպված միջոցառումներին իր մասնակցությունն է ունեցել Վիրահայոց թեմը: Թեմակալ առաջնորդ Գերաշնորհ Տեր Վազգեն եպիսկոպոսը Միրզախանյանը, հրավիրված լինելով հյուրընկալության առիթով կազմակերպված միջոցառումներին, ներկա է գտնվել Վրաստանի նախագահի նստավայրում Սրբազան քահանայապետի հետ երկրի նախագահի, օրենսդիր և գործադիր մարմինների ղեկավարների հանդիպմանը: Այս մասին հայտնում են Վիրահայոց թեմից: 

Վազգեն Սրբազանը Վրաց Ուղղափառ Եկեղեցու Պատրիարքարանում մասնակցել է նաև Համայն Վրաստանի կաթողիկոս –պատրիարք Իլիա Երկրորդի կողմից Հռոմի պապի պատվին կազմակերպված ընդունելությանը:

Վիրահայոց թեմի հավատացյալները Թեմի առաջնորդի գլխավորությամբ ներկա են գտնվել Թբիլիսիի Մ.Մեսխիի անվան մարզադաշտում Սրբազան Քահանայապետի ձեռամբ մատուցված Սուրբ Պատարագին, որի ավարտին Գերաշնորհ Տեր Վազգեն եպիսկոպոսը Հռոմի Ֆրանցիսկոս պապին փոխանցել է Ն.Ս.Օ.Տ.Տ. Գարեգին Բ Ամենայն Հայոց Կաթողիկոսի եղբայրական ողջույնները: Միջոցառումներին Վիրահայոց թեմի առաջնորդին ուղեկցում էին առաջնորդի օգնական հոգեշնորհ Տեր Խորեն վարդապետ Հովհաննիսյանը և Թեմի իրավական և համագործակցության հարցերի բաժնի տնօրեն Միքայել Ավագյանը:

Վիրահայոց թեմն իր աջակցությունն է բերել նաև Հռոմի պապի ժամանման աշխատանքներին, որոնց մեջ ընդգրկված են եղել Թբիլիսիի Սուրբ Գևորգ առաջնորդանիստ և Սուրբ Էջմիածին եկեղեցիների երգչախմբերը և Վիրահայոց թեմի երիտասարդական բաժնի ակտիվիստները: