Ձեր վստահելի աղբյուրը

Ընտրական գործընթացները ցանկացած երկրի ժողովրդավարության ողնաշարն են, եթե այդ քաղաքական կամպանիայի ժամանակ հասարակության քաղաքական ուժերի նկրտումները, ցանկությունները, ծրագրերը, ձայները չեն արձանագրվում, կամպանիաները համարվում են ձախողված,- Ազգային ժողովում Կենտրոնական ընտրական հանձնաժողովի նախագահի ընտրության հարցի քննարկման ժամանակ հայտարարեց ՀԱԿ խմբակցության անդամ Արամ Մանուկյանը:

Ըստ նրա, այդ կամպանիաների ընթացքում հիմնական խաղացողը քաղաքական ուժերն են, դրանց մեջ կա լուրջ խաղացող՝ Կենտրոնական ընտրական հանձնաժողովը:

«Շատ երկրներում ԿԸՀ-ն ուղղակի իսկապես վերդիկտ կայացնող, քաղաքական մթնոլորտի վրա ազդեցություն ունեցող, քաղաքական կուսակցությունների վրա լուրջ խաղացողի ազդեցություն ունեցող միավոր է: Դուք երբեք չպայքարեցիք այդ միավորը դառնալու համար»,- ասաց Ա.Մանուկյանը՝ հավելելով, որ եթե առաջ Հայաստանի ԿԸՀ-ն իրավունք ուներ  կեղծելու ընտրությունները, հիմա այդ իրավունքն էլ չունի: 

Ըստ նրա, այնքան է մշակվել համակարգը, որ մարդու ազատ քվեարկելու իրավունքը խոչընդոտում են ոչ թե ընտրական ընթացքում, այլ ընտրություններից առաջ: Ընդդիմադիր պատգամավորի խոսքով՝ Վանաձորում, Գյումրիում ականատես եղան, որ իջել է կաշառքի  որակը. «Մարդ ամաչում է, որ այս երկրի քաղաքացին է, որ այդպես են մարդուն նվաստացնում՝ բաղնիքում լողանալու տոմսեր, ժամկետն անցած թեյի տուփեր, 1000 դրամանոց ակնոցներ: Պետական հիմնարկները մասսայական քաղաքացուն ահաբեկում էին, վախեցնում: Ընտրությունների գալիս էին վախեցած»:

Արամ Մանուկյանն ասաց, որ Հայաստանում բացառվում է ընտրություն միջոցով իշխանության փոփոխությունը:

«Հնարավոր չէ, որ քաղաքական իշխող ուժը 40-50  տոկոս ստանա իր 20-րդ տարում, հնարավոր չէ, օրինաչափ չէ: Չի կարող այսպես լինել: Սա լուրջ քաղաքական խնդիր է: Մի երկրում, որտեղ չկա ընտրության իրավունք, չկա ազատ կամքի արտահայտության իրավունք, չկա քվեաթերթրիկը որպես երկրի ճակատագիրը որոշ գործիք, այդ երկիրը կործանվում է: Այսպես չի կարելի, քվերակող չունենք արդեն»,- նշեց նա:

Մանրամասները՝ տեսանյութում: